A Xunta resolve máis de 32.000 expedientes de dependencia e discapacidade entre xaneiro e abril

A Consellería de Política Social e Igualdade anunciou que nos primeiros catro meses de 2025 se emitiron máis de 32.000 resolucións vinculadas á dependencia e á discapacidade en Galicia, o que supón un incremento do 70 % respecto ao mesmo período do ano anterior.

A mellora na xestión atribúese á aplicación do Plan de Simplificación e Axilización da Dependencia e a Discapacidade, posto en marcha no mes de xaneiro, co obxectivo de reducir os prazos e optimizar os procedementos administrativos. Segundo a Xunta, "as valoracións avanzan a bo ritmo e mesmo superan as previsións iniciais".

Entre as claves da mellora está a implementación dun modelo de solicitude conxunta, que permite unificar trámites e reducir tempos de espera tanto para persoas con dependencia como con discapacidade. O plan tamén inclúe medidas como a mellora na xestión de citas, a optimización administrativa, o reforzo do papel dos servizos sociais, un protocolo de colaboración co Sergas e a activación dun plan de formación específico para os profesionais do sector.

Desde a Consellería lembran que un dos compromisos do novo plan é resolver todas as solicitudes nun prazo máximo de seis meses, fronte aos retrasos que viña acumulando o sistema. A Xunta sinala que o impacto positivo desta iniciativa demostra que "a redución da burocracia e a coordinación entre administracións son ferramentas clave para garantir dereitos e mellorar a atención social".

O Goberno galego prevé manter este ritmo de resolución de expedientes ao longo de 2025, co obxectivo de seguir reducindo listas de agarda e facilitando o acceso das persoas afectadas aos recursos e prestacións que lles corresponden.