O XXXIV Premio de Xornalismo Xosé Aurelio Carracedo recoñece a traxectoria de Fernanda Tabarés e premia un programa de Alfonso Cid

A Deputación de Ourense deu a coñecer este sábado o fallo do XXXIV Premio de Xornalismo Xosé Aurelio Carracedo, un galardón que cada ano distingue o labor informativo realizado desde e sobre Galicia. Nesta edición, a xornalista ourensá Fernanda Tabarés Domínguez recibiu o recoñecemento honorífico á traxectoria profesional, mentres que Alfonso Cid González foi premiado polo mellor traballo xornalístico.

Segundo o xurado, Tabarés é unha "figura indispensable do xornalismo galego contemporáneo", recoñecida polo seu "traballo rigoroso, comprometido e sempre apegado aos principios deontolóxicos da profesión". Tamén se destacou a súa contribución a visibilizar o papel das mulleres na comunicación e a súa implicación como "motor de cambio social".

Na categoría de mellor traballo, dotada con 4.000 euros, resultou gañador un programa emitido en Radio Liverdade no que Alfonso Cid narra a historia de Obdulia Díaz Picouto e a súa filla Lola Nóvoa Díaz, dúas mulleres ourensás que, durante case catro décadas, ofreceron apoio a máis de 200 menores na zona vella da cidade, moitos deles fillos de prostitutas. O xurado salientou a capacidade do espazo para transmitir emoción e rigor, destacando o valor humano das protagonistas.

O accésit, cunha dotación de 1.000 euros, foi concedido á reportaxe de Úrsula Lorenzo Rubial e Andrés Vilela Aneiros, emitida en Antena3 Noticias, sobre a xornada dunha enfermeira no rural galego. A peza foi eloxiada pola súa calidade audiovisual e pola forma en que presenta información de actualidade con precisión e claridade.

O Premio Xosé Aurelio Carracedo reafirma así o seu compromiso co xornalismo de calidade, próximo á cidadanía e comprometido coa realidade social galega.