Un incendio nun piso de Ferrol obriga a evacuar a tres persoas ao hospital
O lume, orixinado por unha manta eléctrica, causou danos polo fume e obrigou a confinar os veciños mentres actuaban os equipos de emerxencia
Por Europa Press / Redacción | FERROL | 04/05/2025 | Actualizada ás 10:48
Un incendio declarado esta madrugada nunha vivenda da rúa Pintor Bello Piñeiro, en Ferrol, obrigou á evacuación hospitalaria de tres persoas, segundo informou o servizo de emerxencias 112 Galicia. O lume tivo a súa orixe nunha manta eléctrica e xerou gran cantidade de fume, o que motivou a mobilización dos servizos de intervención.
O aviso produciuse arredor das 06:20 horas, cando varios particulares contactaron coa central de emerxencias tras percibir fume nas escaleiras do edificio. Activouse entón un operativo no que participaron os Bombeiros de Ferrol e Narón, Urxencias Sanitarias de Galicia-061, así como efectivos da Policía Nacional e Local.
Os ocupantes do piso afectado refuxiáronse no balcón mentres chegaban os equipos de emerxencia e non correron perigo inmediato. O resto dos residentes do inmoble foron confinados nas súas vivendas durante os traballos de extinción, co obxectivo de garantir a súa seguridade.
Unha vez controlado o lume, os bombeiros procederon á ventilación do edificio, xa que a principal afectación foi debida ao fume acumulado, máis que ás chamas. As tres persoas evacuadas foron trasladadas ao Hospital Arquitecto Marcide, sen que transcendera o seu estado.
