O BNG reclama reforzar o sistema de protección de menores en Galicia

A deputada do BNG e responsable de Infancia, Ariadna Fernández, instou este domingo á Xunta a actuar de maneira urxente para garantir unha atención adecuada aos menores tutelados polo sistema galego de protección. Segundo a parlamentaria, os centros residenciais da comunidade atópanse "sobre saturados", chegando ao 108% da súa capacidade, cifra recoñecida pola propia Consellería de Política Social.

A formación nacionalista reclamou unha revisión das ratios de persoal e dos perfís profesionais que prestan servizo nos centros, especialmente nos turnos nocturnos, para adecualos ás necesidades reais dos menores. "Os cocientes actuais son insustentables e están a afectar directamente á calidade da atención", advertiu Fernández.

Outro dos puntos sinalados foi a rotación constante de profesionais nos equipos técnicos, situación que, segundo o BNG, impide un seguimento axeitado dos casos e dificulta a creación de vínculos de confianza e estabilidade emocional entre educadores e menores.

"Non se pode permitir que os menores saian do sistema sen ferramentas, sen estabilidade nin recursos para encarar un futuro con opcións. A Xunta ten a obriga de crear contornas seguras e unha atención personalizada", afirmou a deputada.

O BNG reclama tamén unha avaliación global do modelo galego de protección, que inclúa unha actualización do Decreto 329/2005, que regula os centros de menores e de atención á infancia. A formación considera este marco normativo "obsoleto" e aposta por incrementar o orzamento e introducir cambios estruturais que garantan a calidade asistencial e os dereitos dos menores.

Finalmente, Ariadna Fernández fixo fincapé na necesidade dunha vontade política firme por parte do Goberno galego para corrixir as deficiencias actuais e situar o benestar infantil como prioridade.