O PSdeG ve na 'neutralidade ideolóxica' da Xunta un "eufemismo" da "desconfianza" no profesorado

O portavoz de Educación do Grupo Socialista, Julio Abalde, criticou a "insistencia pertinaz" do conselleiro de Educación, Román Rodríguez, en impor a chamada "neutralidade ideolóxica", que cualificou como un "eufemismo" da desconfianza no profesorado e do freo ao desenvolvemento do pensamento crítico do alumnado. O deputado socialista afeou que, baixo o pretexto de reforzar a consideración docente, en realidade se cuestione a súa capacidade para formar en liberdade.

Abalde respondeu así ás palabras do conselleiro, que esta semana defendeu a "neutralidade ideolóxica" como base do pensamento crítico durante a presentación das novidades do curso escolar 2025/26. Para o socialista, detrás desta mensaxe escóndese unha "campaña de propaganda" que busca tapar o "fracaso e incumprimento" dos compromisos do goberno galego coa educación pública. Sostén que os anuncios de Rodríguez non supoñen melloras reais nin en infraestruturas nin en recursos humanos.

O portavoz socialista alertou ademais do "descoñecemento" co que afrontan os centros o inicio do curso, xa que a unha semana da súa apertura aínda non saben se contarán co profesorado de reforzo ou cos desdóbrelos solicitados. Recordou que o 12% do alumnado galego precisa apoio educativo, polo que considera "intolerable" que a Consellería "escatime información" e volva ser "cicatera" co ensino público.

Abalde tamén cualificou de "parches" medidas como a redución no IRPF dunha parte do gasto en material escolar para familias que non reciben axuda nos libros de texto, e censurou a supresión da gratuidade universal. Ademais, criticou o retroceso no programa dixital E-Dixgal, ao que sinalou como exemplo do "fracaso" do modelo educativo do PP, e advertiu de que aínda se agarda explicación sobre a aplicación da nova Lei de Formación Profesional en Galicia.