Balance de violencia machista do ano 2024: unha muller asasinada cada 7,6 días, con 5 crimes en Galicia
Un 25 % delas foron asasinadas en cidades pequenas ou pobos, segundo se desprende do 'Informe sobre vítimas mortais da violencia de xénero e doméstica no ámbito da parella ou exparella' de 2024, que publicou este luns o Observatorio contra a Violencia Doméstica e de Xénero, do Consello Xeral do Poder Xudicial.
Por Europa Press / Redacción | MADRID | 05/05/2025 | Actualizada ás 14:24
Unha muller foi asasinada por violencia machista cada 7,6 días en 2024, un 25 % delas en localidades de menos de 25.000 habitantes, segundo se desprende do 'Informe sobre vítimas mortais da violencia de xénero e doméstica no ámbito da parella ou exparella' de 2024, que publicou este luns o Observatorio contra a Violencia Doméstica e de Xénero, do Consello Xeral do Poder Xudicial (CGPJ).
O ano pasado producíronse 48 asasinatos de mulleres por violencia de xénero, unha cada semana (7,6 días). Ademais, 12 dos casos (25 %) tiveron lugar en localidades de entre 10.001 e 25.000 habitantes. Doutra banda, o informe recolle que o 2024 foi un ano "especialmente tráxico" en violencia vicaria, con nove casos, cifra que ascende a 62 desde 2013, cando se empezaron a solicitar datos. Desde entón, rexistráronse unha media de 5,2 casos cada ano, o 74,2 % das vítimas menores de 10 anos.
Neste sentido, cinco dos seis agresores de 2024 foran denunciados previamente polas súas parellas ou exparellas, unha porcentaxe máis elevada (83 %) que na serie histórica (35,4 %). Tamén é superior esta cifra á das denuncias previas da serie histórica dos asasinatos de mulleres por violencia de xénero (26 %). Así mesmo, o CGPJ apunta que catro dos menores asasinados o ano pasado convivían no momento do crime co seu agresor, un home cunha idade media de 36,8 anos. Na serie histórica, a convivencia deuse no 77,4 % dos casos. No 2024 sete dos nenos eran fillos biolóxicos dos agresores, o que supón un 77,7 %, porcentaxe que se eleva hasra o 85,5% se se analizan todos os casos desde 2013.
Igualmente, catro dos seis causantes das mortes de menores o ano pasado tiñan nacionalidade española. O mesmo número deles foron detidos e dous suicidáronse. O agresor suicidouse no 45,8 % dos casos de violencia vicaria na serie histórica, 23 puntos máis alto respecto dos que asasinaron a mulleres (22,4 %). Mentres, o método máis empregado para cometer o crime de violencia vicaria, desde 2013, é a arma branca (35 %). Aínda que, no 2024 estivo presente nun dos casos. Os outros asasinatos foron causados por asfixia, envelenamento, arma de fogo e golpes. Ademais, sete dos nove casos do ano pasado ocorreron no domicilio, que compartían co agresor, o escenario tamén do 71% dos crimes de menores desde 2013.
No caso de Galicia, foron cinco os asasinatos machistas rexistrados: A.M.I.A., de 24 anos e de Perú, asasinada en Ribeira en marzo do ano pasado; M.R.M., española de 74 anos asasinada na Coruña en agosto; F.A., de Marrocos e de 41 anos, asasinada en Moaña en outubro; E.B.S., española de 36 anos e asasinada en Baiona en novembro; e R.S.X., de 42 anos e de Brasil, asasinada en Viveiro en decembro. Segundo o informe do Observatorio contra a Violencia Doméstica e de Xénero do CGPJ, a taxa de mulleres (maiores de 15 anos) asasinadas en crimes machistas por cada millón de mulleres foi de 4 en Galicia durante o ano pasado, mentres que a taxa acumulada desde 2003 é de 55,9 asasinadas por cada millón de mulleres. Ademais, desde 2013, houbo tres menores asasinados en Galicia, vítimas da violencia vicaria.
