O cambio do status de protección do lobo decidirase o xoves

O pleno do Parlamento Europeo aprobou este martes tramitar pola vía rápida o cambio do status de protección do lobo, polo que decidirá o xoves se o rebaixa de "estritamente protexido" a "protexido". Nunha votación a man alzada, a Eurocámara votou a favor de axilizar o traballo sobre o proxecto de lei que permite unha modificación específica da directiva de hábitats para harmonizar o status de protección do lobo na UE co Convenio de Berna.

Os Vinte e sete xa aprobaron a proposta da Comisión Europea para rebaixar o status de protección desta especie sen modificacións, polo que se os eurodeputados aproban o texto o xoves, o proxecto de normas só necesitará a aprobación formal do Consello para entrar en vigor. En todo caso, o lobo seguirá sendo unha especie protexida e as medidas de conservación e xestión dos Estados membros deberán alcanzar e manter un estado de conservación favorable.

Un lobo ibérico do Centro do Lobo Ibérico en localidade de Robledo de Sanabria, en plena Serra da Culebra | Fonte: Carlos Castro - Arquivo