Nace a AECT de Raia Seca-Gerês Xurés para reforzar o acceso a fondos europeos

Galicia e o norte de Portugal dan un paso decisivo na súa cooperación transfronteiriza coa firma do convenio e os estatutos da Agrupación Europea de Cooperación Territorial (AECT) Raia Seca-Gerês Xurés.

O acto institucional tivo lugar este martes no Centro Cultural Marcos Valcárcel da Deputación de Ourense, entidade que lidera esta nova alianza xunto ás comunidades intermunicipais portuguesas de Alto Minho, Cávado, Alto Tâmega e Barroso. A nova agrupación abarca un territorio de máis de 3.100 quilómetros cadrados e reúne a 13 municipios da provincia de Ourense, que sumados aos territorios portugueses cifran unha poboación total superior aos 72.000 habitantes.

Entre os seus obxectivos destacan a mellora de servizos públicos, a loita contra o despoboamento, o fomento do ecoturismo, a protección do medio ambiente e a articulación dunha estratexia compartida nunha das fronteiras máis dinámicas da Unión Europea.

O presidente da Deputación, Luís Menor, cualificou a AECT como "un instrumento maduro para unha rexión transfronteiriza única en Europa", subliñando que a Raia, "lonxe de ser unha fronteira que nos separa, é algo que nos fai sentir unidos". Menor agradeceu o respaldo unánime do pleno provincial a este proxecto e remarcou que a agrupación nace "para situar ás persoas no centro das políticas", nunha cooperación real que dá continuidade a décadas de traballo conxunto.

COMUNIDADES ENERXÉTICAS

Desde a Xunta, o conselleiro de Presidencia, Diego Calvo, destacou o carácter histórico do acordo, ao consolidar xuridicamente un espazo de oportunidades compartidas. Na súa intervención, sinalou que esta ferramenta permitirá afrontar con máis garantías os desafíos actuais do territorio: despoboamento, falta de dinamismo económico ou emerxencia climática.

Por parte dos socios portugueses, Manoel Batista, presidente da Cámara Intermunicipal do Alto Minho, celebrou "o fin dun longo camiño" que permitirá "unha colaboración activa para un traballo de excelencia nos próximos anos". Na mesma liña expresouse o vicepresidente da Comisión de Coordinación e Desenvolvemento Rexional do Norte de Portugal, Beraldino Pinto, quen valorou "a dinámica da proximidade de pensamento e a unión dos problemas e obxectivos a ambos os dous lados da Raia".