O PP recorta distancia co PSOE en estimación de voto tras o apagamento, mentres o BNG sobe ata o 1 %
Seis de cada dez españois criticaban a falta de información do Goberno.
Por Europa Press / Redacción | SANTIAGO DE COMPOSTELA | 14/05/2025 | Actualizada ás 15:20
O Barómetro de Opinión do Centro de Investigacións Sociolóxicas (CIS) do mes de maio, realizado poucos días despois do apagamento xeral que sufriu a Península Ibérica o 28 de abril, mantén ao PSOE na cabeza a pesar de perder seis décimas, e recórtase a 2,7 puntos a diferenza co PP, que sobe tres puntos. No caso do BNG, tamén rexistra unha alza de dúas décimas con respecto ao Barómetro de abril ao alcanzar un 1% en estimación de voto (en porcentaxe sobre voto válido).
Pola súa banda, o PSOE repite en primeiro lugar cunha estimación de voto do 32 %, mentres que o PP sobe ata o 29,3 % despois de marcar o seu peor dato o mes anterior. A terceira praza segue en mans de Vox, a pesar de que cae un punto e medio e agora anótase un 13,7 %, e máis lonxe aparecen Sumar, cun 6,1 %; Podemos cun 4,3 %; e Se Acabó la Fiesta co 1,5 %. A enquisa baséase en 4.018 entrevistas telefónicas realizadas en apenas catro días, do 5 ao 8 de maio, tras a ponte do primeiro de Maio e unha semana despois do cero enerxético. Por medio o CIS realizara unha sondaxe flash sobre o apagamento no que seis de cada dez españois criticaban a falta de información do Goberno.
O PSOE PERDE INTENCIÓN DE VOTO
Ao preguntar aos enquisados a quen votarían se mañá mesmo houbese eleccións, o que se coñece como voto directo, un 22,5 % xa adianta o seu apoio ao PSOE fronte ao 20,3 % que anuncian o seu respaldo ao PP, apenas dous puntos de diferenza, cando o mes anterior había cinco. Iso si, un 14,8 % aínda non sabe a quen votaría, un 3,7 % rexeita contestar e un 7,4 % inclinaríase pola abstención. A conclusión do CIS, seguindo a fórmula ideada polo seu presidente, o sociólogo socialista José Félix Tezanos, e polo profesor Antonio Alaminos, é que o PSOE conta cunha estimación de voto do 32 %, o que supón catro décimas menos que o mes anterior e tres décimas máis que o seu resultado de xullo de 2023, cando quedou segundo.
Por contra, o PP dispárase ao subir algo máis de tres puntos, pasado do 26,1 % de abril, o seu peor rexistro, ao 29,3 % de maio, aínda por baixo do 33 % co que gañou as últimas eleccións. En consecuencia, a distancia entre ambos recórtase á metade en apenas un mes: agora é de 2,7 puntos, cando en abril chegou ata os 6,5 puntos, a máis ancha da lexislatura. Na terceira praza repite Vox, agora cunha estimación de voto do 13,7 %, un punto e medio menos que o é anterior, cando batera marca. E segue lonxe Sumar, que en maio se anota un 6,1 %, unha décima menos que o mes anterior. Con estas cifras, a suma dos partidos do Goberno apenas supera o 38 %, mentres que PP e Vox chegan ata o 43 %.
PODEMOS, A MENOS DE DOUS PUNTOS DE SUMAR
Detrás aparece Podemos, que tras o seu congreso de abril sobe ata o 4,3 % e xa está a menos dous puntos de Sumar, e o partido Acabouse a Festa (SALF) do eurodeputado Luís 'Alvise' Pérez Fernández, ao que se calcula un respaldo do 1,5 %, unha décima por baixo de Esquerra Republicana. En canto á valoración de lideres, a clasificación segue encabezada polo socialista Pedro Sánchez, cunha nota media de 4,15 puntos, superando tanto á líder de Sumar, Yolanda Díaz, como ao presidente do PP, Alberto Núñez Feijóo, cualificados con 3,89 e 3,78 puntos, respectivamente.
O secretario xeral do PSOE é tamén o político preferido para presidir o Goberno, e así o menciona a cuarta parte dos entrevistados (25,4 %), moi por enriba de Feijóo (10,2 %), o líder de Vox, Santiago Abascal (7,4 %) e a presidenta de Madrid, Isabel Díaz Ayuso (6,4 %). Iso si, un 27 % non quere a ningún dos mencionados. A base da enquisa do CIS do mes de maio volve presentar unha maioría de votantes do PSOE, xa que entre os enquisados hai máis votantes socialistas que do PP en 2023, a pesar de que o resultado naquelas eleccións foi o inverso. A marxe de erro é de máis/menos 1,6 %.
