CC.OO. reelixe a Amelia Pérez como secretaria xeral en Galicia para un novo mandato

O sindicato Comisións Obreiras de Galicia (CC.OO.) confirmou este venres a continuación de Amelia Pérez Álvarez á fronte da súa secretaría xeral durante os próximos catro anos. A decisión foi adoptada no marco do 13º Congreso Nacional da organización, celebrado en dúas xornadas con participación de 150 delegados, que tamén aprobaron as liñas estratéxicas do sindicato ata o 2028.

No seu primeiro discurso tras ser reelixida, Pérez Álvarez destacou a mobilización do persoal do comercio de alimentación en Ourense, a quen definiu como protagonistas dunha "folga histórica". Aproveitou tamén para criticar o comportamento de determinadas empresas que, segundo declarou, "contan con importantes beneficios, pero pretenden pagar só o salario mínimo".

Durante o congreso tamén se abordaron temas como a igualdade no movemento sindical, co chamamento da secretaria xeral a fomentar "a sororidade, a empatía, o traballo en equipo e a colaboración" para encarar os desafíos actuais.

A líder sindical fixo ademais referencia á participación da organización na manifestación polo Día das Letras Galegas, reafirmando o compromiso de CC.OO. coa lingua propia. "Manteremos intacto o noso compromiso fronte a eses ignorantes, imbéciles e escuros que desprezan o idioma", declarou.

Xunto á secretaria xeral, formarán parte da nova Comisión Executiva dez membros: Antonio Milleiros Jorge, Maica Bouza Seoane, Armando Igrexas Rodríguez, María José García Barcia, Xesús Castro Baamonde, Leila Piñeiro Otero, Carlos Pérez Fernández, Yolanda Martínez Quintián e Óscar Cebeiro González.

O congreso acolleu inicialmente 26 propostas de resolución, que foron unificadas en oito documentos finais tras o debate interno. Neles tratáronse temas como o acoso laboral, a posición contraria á fábrica de Altri, a defensa da industria da automoción e a importancia de reforzar a loita sindical no contexto actual.