Rueda admite o gran problema da saúde mental en Galicia pero di que se aumentaron os psicólogos
O presidente constata que o problema "crece": case medio millón de galegos pasaron por unha consulta de saúde mental o ano pasado.
Por Europa Press / Redacción | SANTIAGO DE COMPOSTELA | 21/05/2025 | Actualizada ás 12:04
O presidente da Xunta, Alfonso Rueda, admitiu que as enfermidades ligadas á saúde mental supoñen "un problema crecente" e defendeu que o Servizo Galego de Saúde (Sergas) actúa. Así, aínda que recoñeceu que hai que "baixar" os tempos de espera, defendeu que o seu Executivo trata de contratar os profesionais que pode e afirmou que está "en proceso" de sumar outros 14 neste 2025, ata pechar o exercicio "con 21" e o reto de chegar con 50 a 2030.
"Están cubertas o cento por cento das prazas de psicoloxía clínica e máis que houbese", replicou, na sesión de control, ás duras críticas que lle lanzou a líder do BNG, Ana Pontón. Pontón acusou a Rueda de "facer da mentira a súa forma de gobernar" e, tras recriminarlle que "deixase en 33,5 millóns" a inversion "real" do seu 'Plan de Saúde Mental', "nada menos que o 60% dos 83 millóns que anunciara", propuxo contratar a 100 psicólogos en Primaria, implantar unidades de atención infanto-xuvenil en todas as áreas sanitarias e impulsar "un verdadeiro plan de prevención do suicidio".
Rueda afeou a Pontón ser "unha política profesional" que "nunca tivo responsabilidades de goberno" e que cre que "todo se arranxa con solucións máxicas". "E dinnos: contraten 100 psicólogos para traballar en Primaria. Vostede sabe que ten que ter o máster habilitante? Que ten que superar o PIR? Que despois teñen que ter o catro anos de residencia? Sabe que todos os que o teñen e están dispostos a traballar, contratámolos?", preguntou o presidente, quen tamén cuestionou as cifras de Pontón.
"Somos conscientes do problema", insistiu o tamén líder do PPdeG, quen tamén puxo en cuestión as cifras de Pontón e acusouna de "terxiversar" o recente informe do Consello de Contas, antes de dar as súas propias cifras. Entre outras cuestións, admitiu que a demanda de servizos de atención á saúde mental "creceu desde a pandemia un 30%".
"MENOS DOS 180 DÍAS"
"É certo que creceu a lista de espera e hai moitas máis persoas, pero aumentou un 11%. A demanda, un 30%; a lista de espera, un 11%. Que un 11% é moito, si, pero é tres veces menos que o aumento da demanda", continuou o presidente galego, quen revelou que 477.471 persoas foron atendidas en Galicia en consultas de saúde mental o ano pasado, máis dun 17,5% da poboación que ten a comunidade (que supera os 2,7 millóns de habitantes).
"As consultas de psicoloxía aumentaron, efectivamente, en cinco anos, case un 46%", continuou o xefe do Executivo galego, antes de proporcionar outra cifra que, recoñeceu, "debe baixar moitísimo máis": "o 83,4% dos pacientes de saúde mental esperan menos, vou dicir unha cifra que ten que baixar, esperan menos de 180 días (un seis meses)".
