Sandra Quintas asume a presidencia do PP en Bande coa vista posta nas municipais de 2027

A agrupación local do Partido Popular de Bande (Ourense) celebrou este venres o seu congreso, no que foi proclamada como nova presidenta Sandra Quintas, actual alcaldesa da localidade e secretaria xeral do PP de Ourense. O acto, que tivo lugar na Casa do Concello, contou coa presenza da secretaria xeral do PPdeG, Paula Prado, e do presidente provincial do partido, Luís Menor, quen destacaron a importancia dos congresos locais para activar as estruturas do partido e preparar o camiño cara ás eleccións municipais de 2027.

Durante a súa intervención, Paula Prado subliñou que o PP está inmerso nun ciclo de renovación orgánica, con múltiples conclaves territoriais en marcha. “Estamos nun ano de moitos congresos, porque para que un partido funcione ben e poida ofrecer credibilidade, ten que estar organizado”, afirmou, en referencia tamén á próxima cita nacional do partido. Segundo a número dous do PP galego, “en Bande ou en Madrid sairá un PP preparado para os retos do futuro, con ilusión, ganas e valentía”.

A elección de Sandra Quintas como presidenta local foi destacada polos líderes populares como un paso estratéxico para consolidar a presenza do partido no territorio. Prado sinalou que Quintas é unha das 30 alcaldesas coas que conta o PPdeG, sendo a formación con maior representación feminina nas alcaldías galegas, con 13 delas na provincia de Ourense. En palabras da secretaria xeral do PPdeG, Quintas “leva máis de cinco anos á fronte do Concello de Bande” e representa “o mellor do noso partido: valentía, compromiso cos veciños e eficacia na xestión”.

Na mesma liña, Luís Menor destacou a traxectoria e capacidade de traballo de Sandra Quintas, tanto no ámbito municipal como na súa responsabilidade orgánica dentro do PP de Ourense. Menor enmarcou esta elección dentro dunha dinámica de renovación xeracional e de impulso político: “Forma parte desa nova xeración de mulleres do PP que representa preparación, visión política e capacidade de traballo”.

A nova presidenta local do PP de Bande terá como obxectivo revalidar a alcaldía nas eleccións municipais de 2027, nun contexto no que o partido busca consolidar gobernos locais “fortes e estables” en palabras de Prado. “Temos dous anos por diante para seguir resolvendo os problemas da xente, e contamos co mellor equipo e a mellor capitá para conseguilo”, apuntou.

O congreso en Bande insírese na estratexia do PPdeG para fortalecer a súa estrutura territorial, un proceso que, segundo os responsables do partido, busca garantir que o PP chegue ás próximas citas electorais con organizacións locais “activadas, cohesionadas e preparadas para gobernar”.