O PP propón no Senado recuperar as microcredenciais como vía de formación e regularización para migrantes

O Grupo Popular no Senado, a través dos seus representantes pola provincia de Lugo, presentará unha proposta para que o Goberno central recupere a vía formativa das microcredenciais como ferramenta para o arraigamento formativo de persoas migrantes en situación irregular.

Segundo explicaron os senadores populares lucenses nun comunicado, a intención da iniciativa é reivindicar o uso deste mecanismo, que ata a recente reforma do Regulamento de Estranxeiría, permitía obter un permiso de residencia temporal ligado ao compromiso de realizar unha formación específica.

Esta modalidade, sinalan, permitía que persoas migrantes puidesen regularizar a súa situación mentres se formaban en competencias demandadas no mercado laboral español, especialmente naqueles sectores que presentan dificultades estruturais para atopar man de obra cualificada, como poden ser a agricultura, a construción, a hostalaría ou os coidados.

Os senadores lucenses lembran que a inclusión das microcredenciais na normativa respondía ao dobre obxectivo de favorecer a integración social das persoas migrantes e responder ás necesidades laborais das empresas, polo que consideran que a súa supresión supón un retroceso na xestión da inmigración e na cobertura de postos de traballo cualificados.

A proposta que se elevará desde a Cámara Alta pretende que o Goberno reconsidere a súa postura e reincorpore esta posibilidade na normativa vixente, sinalando a súa "necesidade e pertinencia" como medida positiva tanto para os migrantes como para o tecido produtivo español.