A inflación industrial en Galicia duplica a media do Estado, cun 4,2%
Rexistra taxas anuais positivas en trece comunidades autónomas e descensos en Andalucía, Murcia, Castela-A Mancha e País Vasco
Por Europa Press / Redacción | Santiago de Compostela | 26/05/2025 | Actualizada ás 11:10
Os prezos industriais subiron un 4,2% en abril en Galicia en relación co mesmo mes do ano anterior, incremento que é máis do dobre do rexistrado pola media, segundo os datos que publica este luns o Instituto Nacional de Estatística (INE).
Por destino económico dos bens, os prezos dos de consumo repuntaron un 1,5% en abril en Galicia, os de equipo un 2,1% e os intermedios un 3,8%. Pola súa banda, os bens de consumo duradeiro baixaron os seus prezos un 0,7% e o non duradeiros aumentaron o seu valor un 1,6%. O prezo da enerxía na comunidade creceu un 7,4%. No conxunto estatal, os prezos industriais subiron un 1,9% en abril en relación ao mesmo mes de 2024, taxa 2,7 puntos inferior á do mes anterior.
Coa taxa interanual do cuarto mes de 2025, a inflación do sector industrial suma seis meses consecutivos de incrementos tras encadear anteriormente 20 meses de taxas negativas. A moderación da inflación industrial en abril foi consecuencia da evolución dos prezos da enerxía, que recortou a súa taxa interanual 10,1 puntos, ata o 5,7%, polo abaratamento da produción, transporte e distribución de enerxía eléctrica e, en menor medida, do refino de petróleo.
Tamén contribuíron os bens intermedios, que recortaron a súa taxa interanual cinco décimas, ata o 0,1%, polo menor custo da produción de metais preciosos e da fabricación de produtos químicos básicos. Por contra, os bens de consumo non duradeiro elevaron cinco décimas a súa taxa interanual en abril, ata o -1,3%, debido a que o descenso dos prezos da fabricación de aceites e graxas vexetais e animais foi menor que en igual mes de 2024.
