A matrícula escolar en Galicia poderase facer desde o móbil
Poderase facer con opción de marcar servizos complementarios e optativas.
Por E.P. | SANTIAGO DE COMPOSTELA | 27/05/2025 | Actualizada ás 16:54
O sistema educativo en Galicia contará cunha ferramenta para realizar a matrícula de forma dixital, que posibilitará que as familias e o alumnado poidan achegar información que ata agora só se podía facilitar de maneira presencial, como a selección de servizos complementarios e de optativas.
Así o explicou este martes o xerente de Proxectos-Desenvolvemento de Educación da Axencia para a Modernización Tecnolóxica de Galicia (Amtega), Pedro Barreiro. Esta entidade adscrita á Consellería foi a encargada de desenvolver este proceso, accesible a través de calquera navegador de internet e adaptado para dispositivos móbiles.
Con todo, quen queira poderá realizar a matrícula de maneira presencial, como ata agora. No caso de Infantil e Primaria o prazo estará aberto entre o 20 e o 30 de xuño e o da ESO e Bacharelato, entre o 23 de xuño e o 7 de xullo.
A matrícula dixital realizarase desde a páxina web 'AdmisionAlumnado' e existirá unha vía de acceso a partir dunha ligazón desde Abalar Móbil. Unha vez dentro, a identificación farase con Chave365 ou mediante un certificado dixital. Nos próximos días, a Consellería enviará aos centros educativos e ás familias instrucións sobre este novo procedemento.
No caso das familias de nova incorporación, recibirán a información a través dos centros escolares onde foron admitidos os seus fillos, posto que aínda non están dentro do sistema Abalar.
