O Sergas nega ocultar datos de listas de espera: "Cúmprese co deber de facilitar información"

O Sergas saíu ao paso das acusacións realizadas este mércores pola plataforma SOS Sanidade Pública en Vigo, onde anunciou unha campaña para reclamar "datos reais" das listas de espera na área sanitaria de Vigo. Así, a Consellería de Sanidade mostrou a súa "absoluta desconformidade" coas declaracións dos membros da plataforma e trasladou que "se cumpre escrupulosamente co deber de facilitar información sobre as listas de espera, segundo o establecido pola normativa estatal e a autonómica.

Así, a través dun comunicado, Sanidade defendeu que se achega información "seguindo criterios de absoluta transparencia", e mesmo se adianta a publicación dos datos antes de ser enviados ao Ministerio de Sanidade, polo que ha vinculados as acusacións de SOS Sanidade Pública a "unha intención de xerar opacidade e confusión ante a opinión pública".

Por outra banda, sinalaron que a demora media nas listas de espera cirúrxica na área de Vigo baixou o ano pasado ata situarse en 63,8 días (fronte aos 64,4 días do ano anterior), e aumentouse a actividade asistencial realizada polos profesionais, tanto en consultas como en intervencións.

Así mesmo, lembrou que as cirurxías de prioridade 1 tiñan unha demora media de 17,4 días ao peche de 2024 (3,4 días menos que en 2023); e tamén se diminuíu (lixeiramente) a espera en intervencións de prioridade 2 e 3, e "só o 0,7 % dos pacientes en lista de espera cirúrxica entre xuño e decembro de 2024 superaron os 180 días", fronte ao 24,3 % de media do Sistema Nacional de Saúde.

O Sergas tamén sinalou que, o ano pasado, rexistráronse 34.731 intervencións (un 4,4 % máis), grazas a un maior rendemento dos quirófanos. Ademais, realizáronse un total de 696 operacións robotizadas.

Tras lembrar que aumentaron tanto as consultas en centros de saúde como en Urxencias, o Sergas indicou que o tempo de espera nas primeiras consultas é de 57,4 días, inferior á media galega e á media nacional. Tamén se referiu a as vías rápidas de cancro, que diminuíron a súa lista de espera de 96 a 79 pacientes, cun tempo medio de 5,4 días.

Finalmente, tras pór en valor o "esforzo" dos profesionais por ofrecer un mellor servizo, con "incremento de novas infraestruturas e persoal, Sanidade afirmou que "non é de recibo acusar a esta área sanitaria de ocultación de datos e de non facer o esfuero suficiente en investimento nas súas instalacións".