Renfe reorganiza os seus talleres de Ourense para "garantir a continuidade da actividade e do persoal"
O xestor ferroviario deixará de manter nas súas instalacións ourensás as locomotoras S333 para especializarse nos vehículos autopropulsados de viaxeiros da serie 599.
Por Europa Press / Redacción | OURENSE | 29/05/2025 | Actualizada ás 14:54
O xestor ferroviario Renfe anunciou que reorganizará a actividade dos seus talleres de Ourense para así "garantir a continuidade" dos mesmos e do persoal. Nun comunicado, a empresa dixo que a base de mantemento de Ourense iniciará unha nova etapa na súa traxectoria con cambios nas súas actividades, que se centrarán, sobre todo, no mantemento de vehículos autopropulsados de viaxeiros e na reparación de compoñentes.
"Estas modificacións supoñen unha aposta pola continuidade da actividade e o persoal no taller", reivindicou Renfe, que engade que se deixarán de manter nas súas instalacións ourensás as locomotoras S333 para especializarse nos vehículos autopropulsados de viaxeiros da serie 599. Como parte destes cambios, a empresa desenvolverá un plan de formación técnica dirixido ao persoal. O programa comezará en xuño co obxectivo de capacitar aos traballadores para os seus novos labores.
Este programa complementarase con accións de adestramento para a reparación de compoñentes pneumáticos e adestramento de banco de probas, reforzando así o perfil técnico e especializado do persoal. Progresivamente, reorganizaranse as áreas de traballo e levarase a cabo unha adaptación das instalacións para adecualas ao novo enfoque operativo. "Con estas accións, a compañía reafirma o seu compromiso coa evolución e a adaptación ás necesidades do sector e a aposta polo futuro do mantemento na base de Ourense, ao substituír o mantemento de parque moi antigo e próximo ao fin da súa vida útil por material máis moderno", sentenciou Renfe.
