Galicia busca sumar máis mulleres ao ámbito STEM con grupos de traballo sectoriais
A Xunta escoitará as voces femininas do sector para deseñar medidas con impacto real na igualdade profesional.
Por Europa Press / Redacción | Santiago de Compostela | 31/05/2025 | Actualizada ás 13:21
A directora xeral de Promoción da Igualdade, María Quintiana, mantivo esta semana unha reunión de traballo coa presidenta da Real Academia Española de Matemáticas, Vitoria Otero, co obxectivo de analizar novas vías de colaboración entre a Xunta e a institución académica para impulsar a presenza das mulleres neste ámbito.
María Quintiana e Vitoria Otero analizaron a situación das mulleres nas Matemáticas, así como as dificultades e barreiras coas que se atopan á hora de continuar coas súas carreiras neste sector.
Así, a directora xeral trasladoulle as iniciativas que está a desenvolver a Xunta neste sentido, como a Estratexia galega de emprego feminino en sectores masculinizados, na que tamén se porá o foco nas carreiras STEM.
Para iso, comunicoulle que se están configurando varios grupos de traballo por sectores nos que participarán mulleres que forman parte deles. Esta será unha escoita activa para coñecer, por sectores, as visións e necesidades para elaborar a estratexia e que teña un impacto real na sociedade galega.
