Máis de 20 anos de prisión para un acusado por corrupción de menores

O home acusado de ameazar e obrigar a dous menores a mandarlle vídeos e fotos sexuais foi condenado a 20 anos e 9 meses de prisión por exhibicionismo e corrupción de menores. En concreto, a Sala do Civil e Penal do TSXG ratificou a sentenza da sección segunda da Audiencia Provincial da Coruña, explicando aos maxistrados que as dúas vítimas e unha amiga usaron xuntas unha aplicación de contactos anónimos e contactaron co procesado por chat.

Na súa resolución, o Alto Tribunal galego destaca que o aspecto físico delas e o seu comportamento "xa deixaba claro que eran menores de 13 anos". Ademais, nas conversacións que mantiveron con el dixéronlle a súa idade, engade o TSXG. A partir de aí, o investigado, usando un nome de usuario, "mantivo diversas comunicacións a través dunha rede social polo menos con dúas das menores". Para dobregar a súa vontade, ameazounas co obxectivo de que lle enviasen fotografías e vídeos espidas e exhibíndose ante el.

"Parece incuestionable que só o acusado podería ser quen establecese contacto coas menores, o que parece deducirse de modo inequívoco dos indicios que foron postos de manifesto, todos eles converxentes nesa autoría. A ponderación global de todos eles leva inexorablemente a poder afirmar ese feito?", subliña o TSXG. A pesar de todo, a sentenza non é firme, xa que cabe recurso ante o Tribunal Supremo.

MULLER CONDENADA EN OURENSE POR ESTAFAR AO SEU TÍO

A sala do civil e penal do TSXG confirmou a sentenza da sección segunda da Audiencia Provincial de Ourense que condenou a tres anos de cárcere a unha muller por estafar ao seu tío de 86 anos, que padecía unha deterioración cognitiva de tipo vascular, ao facerse con todos os seus aforros e ingresalo nunha residencia de anciáns, lugar onde faleceu.

Ademais, deberá abonar 43.020 euros ao fillo da vítima en concepto de responsabilidade civil. O tribunal declara probado que a acusada aproveitou a condición do seu tío e o estado de vulnerabilidade no que se atopaba, así como do feito de que o seu único fillo vivía no estranxeiro, para levalo a vivir con ela e co seu marido cando o home, tras sufrir un síncope, saíu do hospital.