O Tribunal Supremo, tallante sobre o caso Servicarne: "É unha cooperativa de traballo asociado ficticia e puramente aparente"

A Sala do Social do Tribunal Supremo ditou sentenza para a unificación de doutrina na que confirma que Servicarne funcionaba como unha falsa cooperativa e que os seus socios tiñan unha relación laboral con Novafrigsa (do Grupo Coren). Así, o alto tribunal dá a razón á CIG e á Seguridade Social, que denunciaron no seu momento unha fraude masiva na contratación. De feito, un xulgado do Social de Lugo xa declarou en 2020 a existencia de relación laboral entre Novafrigsa e os máis de 300 socios de Servicarne que traballaban para a empresa entre 2013 e 2017, despois de que a Inspección de Traballo (no marco dunha campaña de inspeccións por todo o territorio nacional a empresas ás que Servicarne daba servizo) emitise unha resolución en abril de 2019 descualificando a esta sociedade como cooperativa de traballo asociado.

As empresas implicadas presentaron recurso de suplicación ante o Tribunal Superior de Xustiza de Galicia (TSXG), que o estimou e revogou a sentenza de instancia; e a Seguridade Social e a CIG acudiron ao Tribunal Supremo, ante a existencia de resolucións contraditorias con esa decisión. O Supremo estimou agora os recursos de casación e sinala na súa resolución, do 28 de maio pasado, que realmente os socios de Servicarne tiñan relación laboral con Novafrigsa, tendo en conta que a cooperativa non dispón das infraestruturas materiais nin os recursos para prestar os servizos recolleitos no seu obxecto social. "Servicarne é unha cooperativa de traballo asociado ficticia e puramente aparente", expón o TS.

Respecto diso, engade que é a empresa principal (neste caso, Novafrigsa), a encargada de facilitar aos socios todo o material que necesitan, do mesmo xeito que fai cos seus propios traballadores. Por iso, do mesmo xeito que no seu momento fixo o xulgado do Social de Lugo, conclúe que Servicarne constituíuse de maneira aparente como unha cooperativa, pero usa esa configuración legal "en fraude de lei" para actuar no mercado como unha entidade "destinada exclusivamente a intermediación de man de obra".

VALORACIÓN DA CIG

O sindicato CIG valorou que o Supremo "recoñece a fraude masiva" na contratación de persoal autónomo en Novafrigsa e a "explotación" dos traballadores, e trasladou o seu desexo de que, tras a resolución do alto tribunal, "se resolvan en cadea os restantes recursos interpostos" por empregados doutras empresas que tamén traballaban como falsos autónomos para Servicarne. Segundo lembrou o sindicato, a sentenza do xulgado de Lugo non só recoñeceu a relación laboral, senón que obrigaba a Novafrigsa a pagar as cotas da Seguridade Social entre 2013 e 2017 e a recoñecer os dereitos individuais destes traballadores.

A decisión do Supremo debe, para a CIG, "pecha o ciclo" de recursos interpostos polas empresas e os traballadores poderán reclamar as cotas que pagaron indebidamente á Seguridade Social como autónomos. Ademais, a central nacionalista lembrou que, segundo a acta de liquidación elaborada pola Inspección de Traballo, Novafrigsa deixaría de pagar á Seguridade Social máis de 4,7 millóns de euros por estes traballadores. Finalmente, lembrou que durante anos o persoal de Novafrigsa e outros traballadores de matadoiros e salas de despezamento de toda Galicia estiveron traballando como falsos autónomos e sendo explotados: cotizando pola base mínima no RETA, con xornadas e quendas sen hora definida de saída, sen dereito a descansos nin vacacións retribuídas ou sen cobrar as horas extraordinarias. Os traballadores de Novafrigsa e doutra empresa que operaban deste xeito, como Frigolouro ou o Grupo Sada, xa foron dados de alta de oficio no Réxime Xeral da Seguridade Social en novimebre de 2017, a instancias da Inspección de Traballo.

Fachada do Tribunal Supremo | Fonte: Carlos Luján - Arquivo