O TSXG absolve a un condenado por abusar sexualmente da súa sobriña ao considerar o delito prescrito

A sala do civil e penal do Tribunal Superior de Xustiza de Galicia (TSXG) absolveu a un acusado que fora condenado pola sección segunda da Audiencia Provincial da Coruña a nove anos de cárcere por abusar sexualmente, de forma continuada, da súa sobriña, nacida en 1989, cando era menor de idade. O alto tribunal galego entende que os feitos polos que foi axuizado estaban prescritos, polo que estimou o recurso de apelación presentado polo sospeitoso contra a sentenza de primeira instancia, a cal revogou.

A sala explica na sentenza que neste caso débese aplicar o réxime de prescrición dos delitos existente antes da reforma de 2010, o que leva que a prescrición dos delitos incluídos na denuncia tería lugar o 1 de febreiro de 2022, "sen que a mera presentación da denuncia tivese a virtualidade interruptiva (suspensiva) pretendida e acollida na sentenza apelada". Os maxistrados recalcan que "o réxime normativo existente antes de outubro de 2010 tería xa extinguido a responsabilidade penal do acusado, hoxe recorrente".

"En definitiva, aplicando a norma que nace en 2010 a delitos cometidos con anterioridade, o resultado sería pexorativo para o reo, infrinxíndose dese modo o principio de irretroactividade das disposicións sancionadoras máis desfavorables", explica o TSXG no fallo, contra o que cabe presentar recurso ante o Tribunal Supremo.

Fachada da Audiencia Provincial da Coruña. M. Dylan