O PP ourensán denuncia “a externalización dos traballos de mantemento” no tecido ferroviario

Os deputados do Partido Popular pola provincia de Ourense, Ana Vázquez, Celso Delgado e Rosa Quintana, pediron ao Ministerio de Transporte e Renfe proximidades un plan de investimentos que garanta a carga de traballo e os empregos no taller de mantemento de locomotoras situado na cidade. Así mesmo, solicitaron ao Executivo central que se pronuncie sobre a proposta da Xunta para crear na comunidade galega unha base de mantemento dos trens de alta velocidade.

Tal e como trasladou o partido nunha nota de prensa, foi a través dunha pregunta dirixida ao Goberno central na que marcaron como punto de partida a publicación, o 12 de maio, dun anuncio da Dirección Xeral de Renfe polo cal se licitaba un contrato de servizos dedicado ao mantemento durante cinco anos de 65 locomotoras da Serie 333.3. Nesta liña, narraron, unha vez coñecida a decisión de Renfe, os deputados ourensáns constataron que a externalización dos traballos de mantemento "xerou unha gran preocupación entre os 32 traballadores do taller da estación de Ourense, que ven en risco o seu posto de traballo", xa que realizan "máis dun terzo" do mantemento das locomotoras.

Por iso, os representantes dos traballadores propuxeron crear unha base en Galicia para as revisións dos trens Avril, debido á "saturación dos talleres de Fuencarral (Madrid)", que aseguraron, fan o servizo de mantemento en Galicia. Ante esta situación, os populares advertiron que a eliminación do taller ourensán suporía un "novo agravio a Galicia", "debilitando aínda máis" a infraestrutura ferroviaria. Ademais, recalcan que a Xunta se uniu á demanda dunha base para o mantemento dos trens de alta velocidade Avril, que son os que operan en Galicia, co obxectivo de "consolidar o emprego ferroviario na comunidade".

AVE de Renfe cun tren da serie 106 (Avril). RENFE | Fonte: Europa Press