Protesta de traballadores de Guidoni Quartz en Narón contra un ERTE que afectará a todo o persoal
Por E.P. | Narón | 13/06/2025 | Actualizada ás 17:00
Os traballadores da empresa Guidoni Quartz, situada no polígono das Lagoas, en Narón, dedicada á fabricación de taboleiros de aglomerados de cuarzo e granito, concentráronse no mediodía deste venres --entre as 13,00 e 15,00 horas-- para expresar o seu rexeitamento ao Expediente de Regulación Temporal de Emprego (ERTE) proposto pola dirección, que afectará durante seis meses á totalidade do persoal, composta por 122 operarios.
O secretario de Construción e Madeira do sindicato CIG na comarca de Ferrol, Marcos Sánchez, explicou que o motivo da concentración é "pedir futuro para a planta de Narón". Sánchez mostrou a súa preocupación ante a falta de claridade sobre a efectividade do ERTE para solucionar os problemas actuais da empresa, cunha recorrente falta de material para poder traballar.
Segundo os datos da reunión de consultas, o ERTE afectaría directamente os operarios se persiste a escaseza de materias primas. O representante sindical confirmou que a paralización da produción por problemas económicos da empresa é unha constante: "Si, é unha das cuestións que hai por problemas económicos da empresa. Pois moitos días están a xente parada sen ter materia prima para atender os pedidos que hai".
Os traballadores esixen solucións concretas que garantan a estabilidade e a operatividade da planta a longo prazo, máis aló da aplicación de medidas temporais como o ERTE.
