A Fundación do Panteón de Galegos e Galegas Ilustres xa é un ben de interese galego
Esta Fundación constituiuse formalmente en abril e desde este luns forma parte das Fundacións de Interese Galego.
Por Europa Press / Redacción | SANTIAGO DE COMPOSTELA | 16/06/2025 | Actualizada ás 12:30
A Fundación do Panteón de Galegos e Galegas Ilustres, situado na compostelá Igrexa de Santo Domingo de Bonaval e onde descansan os restos de destacados intelectuais e galeguistas como Alfonso Daniel Rodríguez Castelao e Rosalía de Castro, entre outros, foi catalogada de interese galego.
En concreto, o Diario Oficial de Galicia (DOG) publicou este luns unha resolución asinada pola secretaria xeral técnica da Consellería de Cultura, Elvira María Casal García, conforme a entidade queda inscrita no Rexistro de Fundacións de Interese Galego. Xa o pasado 30 de maio, o DOG recollía unha orde do conselleiro de Presidencia, Diego Calvo, que declaraba esta fundación como de interese cultural.
A Fundación quedou formalmente constituída nun acto público o pasado mes de abril, un paso que permitiu pechar un proceso que se iniciou cando se empezou a desenvolver a lei aprobada por unanimidade na Cámara autonómica no verán de 2023 para sacar do limbo xurídico ao Panteón, que pasou a ser identificado como símbolo de Galicia. Para a súa xestión, optouse pola fórmula de fundación e as bases da súa activación empezáronse a sentar nun encontro formal en outubro do ano pasado coa implicación de Parlamento, Xunta, Concello de Santiago e Arcebispado, a quen os seus estatutos sinalan como fundadores.
