Dez anos do Castelo Conta: tradición oral e encontro colectivo reivindican a cultura en Culleredo

O Castelo Conta celebra este verán o seu décimo aniversario cunha edición especial que se estenderá durante dez días consecutivos, do 22 ao 31 de agosto. Esta proposta naceu no rural hai dez anos "para celebrar a cultura e o encontro comunitario ao redor da festa". Tal e como apuntan desde a organización, o director do Castelo Conta, Xosé A. Touriñán, agradeceu "o apoio institucional e da veciñanza que fixo posible chegar á décima edición dun festival que sempre quixo tecer redes para que o que sucede en Castelo poida inspirar a outros lugares".

A programación desta edición, que comeza o vindeiro 22 de agosto, conta con máis de 50 actividades que engloban concertos, entretemento para as crianzas e novidades como a Gala dos Dez Anos, a estrea da canción que Sés dedicará a Castelo ou o incremento das prazas do campamento Xente Miúda. Tamén contarán con varias actividades que xa son habituais: os Contos de Castelo, onde a veciñanza maior compartirá historias e lembranzas mantendo o formato próximo e interxeracional; ou Xente Miúda do Castelo Conta, cinco xornadas de actividades dirixidas ás máis pequenas e pequenos.

O sábado 30 de agosto é o día agardado por todos. O Castelo Conta organiza unha andaina polas aldeas de Castelo, que rematará "co xa tradicional espectáculo de monólogos, conducido por Touriñán, e no que participarán David Amor, Lucía Veiga, David Perdomo, Marita Martínez, Quico Cadaval, Oswaldo Digón, Gari Garrido, Pepo Suevos, Patricia Castrillón e Javier Veiga", afirman desde a organización.

UN NOVO ESPAZO NATURAL PARA A MÚSICA: O MONTE XALO

O auditorio natural do Monte Xalo acollerá actuacións como a de Carlos Núñez, Sés, Alana ou Ortiga, e onde tamén estarán as Tanxugueiras, nunha sesión vermú especial o domingo 24. "A música será un dos piares desta edición, con concertos repartidos en diferentes espazos e horarios, desde sesións vermú ata seráns nas aldeas de Castelo". Ningún recuncho queda sen alegría no Castelo Conta, onde todos teñen cabida para poder gozar dunhas xornadas de alegría e desfrute colectivo. 

De Vacas, Lisdexia, Monoulious DOP, Zënzar ou Gintonis serán algunhas das propostas musicais previstas para as noites do festival, ás que se sumarán desde o mércores outros espectáculos, como unha gran foliada, a estrea do documental 'Buscando a nova regueifa', a Gala dos dez anos do Castelo Conta -un espectáculo especial de aniversario que mesturará música, humor e memoria do festival- ou Somos Criminais e punto final, o espectáculo máis exitoso de Carlos Blanco e Xosé A. Touriñán.

VERMÚS NA TABERNA E TAPAS EN DIRECTO

Concertos:

• Brais Morán e Nasaufunk
• Abril
• Pava
• 9louro
• The Rapants
• Vermús na Taberna

Cociñeiros:

• Jorge Trigo (A Espiga)
• Nacho Moreira (La Esquina de Valentina)
• Kike Piñeiro e Eloy Cancela (A Horta do Obradoiro)
• Lolo Mosteiro e Paula Martínez (A Artesa da Moza Crecha)
• Damián Paris (Dekanta't)
• Xosé Magalhaes e Lydia del Olmo (Ceibe)
• Bea Sotelo, Bego Vázquez (Regueiro da Cova)
• Chisco Jiménez (Culuca).

A programación completa do Castelo Conta está dispoñible nesta ligazón e nas redes sociais do festival, onde se compartirán tamén contidos especiais polos dez anos. A entrada para a maioría das actividades é de balde, pero as entradas para aquelas que requiran un pago están xa dispoñibles na web do festival.