Pescadores galegos piden que se fale do impacto na pesca no decreto da eólica mariña

A Plataforma en Defensa da Pesca e dos Ecosistemas Mariños informa de que presentou alegacións ao proxecto de decreto para establecer condicións de seguridade marítima e prevención da contaminación da instalación da eólica mariña co fin de que se avalíe o seu impacto sobre os 'stocks' pesqueiros.

Nun comunicado, esta entidade que agrupa a pescadores galegos aposta por monitorar a situación da zona de instalación en relación á presenza de contaminantes, así como "realizar unha cartografía da situación biolóxica dos diferentes 'stocks' pesqueiros presentes na zona para valorar o seu posible impacto en relación á instalación das estruturas da eólica mariña".

Así mesmo, avoga por garantir zonas de seguridade para o tránsito de pesqueiros e "prohibir calquera actividade pesqueira na zona de instalación dos polígonos de eólica mariña debido aos riscos de colisión, dificultade para realizar as actividades pesqueiras e dificultade de acceso de aeronaves no suposto de accidente na devandita zona".

Ademais, os cables de evacuación deberán ir soterrados a profundidades que permitan a actividade pesqueira de todas as artes ao longo do seu percorrido ata a chegada a terra. Tamén apunta que se deberá avaliar posibles cambios nos patróns de vento e correntes para valorar tanto a afectación á seguridade marítima como á produción primaria de fitoplancto.

Enerxía eólica mariña / SEO/BIRDLIFE - Arquivo