Galicia contará cun código para reducir a mortalidade por traumatismo grave a partir do 15 de xullo

A Consellería de Sanidade lanzará un novo protocolo para reducir a mortalidade e as posibles secuelas por traumatismos graves en urxencias, que inclúe a pacientes pediátricos, e o cal busca actuar dunha forma máis rápida e coordinada para garantir unha maior efectividade na actuación. Así o presentou en rolda de prensa este mércores o conselleiro de Sanidade, Antonio Gómez Caamaño, na que detallou que o 'Código trauma' entrará en vigor o próximo 15 de xullo.

O traumatismo grave, detallou o conselleiro, é "unha causa frecuente de mortalidade dos menores de 45 anos". Estes traumatismos poden producirse por accidentes de tráfico, caídas, afogamentos, queimaduras críticas, lesións por inhalación, queimaduras ou lesións químicas, entre outras. Todas elas, son patoloxías tempo-dependentes polo cal, subliñou o conselleiro, os primeiros 60 minutos, a denominada 'hora de ouro', xoga un papel "crucial". 

Neste sentido, o novo protocolo busca "actuar máis rápido" e dunha forma "máis coordinada" co obxectivo de garantir unha "maior efectividade", o que permitirá, segundo detallou o conselleiro, "reducir a mortalidade e as posibles secuelas" do paciente. "Este protocolo asistencial que presentamos define as actuacións necesarias para identificar, no menor tempo posible, unha situación de trauma grave", recalou.

Desta forma, o código asistencial fixa os supostos e criterios para activar o protocolo de trauma grave. Para iso, prestará atención ás pautas fisiolóxicas, como alteración do nivel de conciencia; criterios anatómicos ou a factores biomecánicos do propio accidente, como pode ser un accidente de tráfico con atrapados ou vítimas múltiples. Así mesmo, define a actuación asistencia inicial, o tratado do paciente e a atención hospitalaria, que porá en alerta a un equipo de profesionais que recibirán ao paciente nos servizos de urxencias.

"Garántese que antes de chegar ao hospital estea todo previsto para a intervención necesaria. Por tanto, este é un protocolo no que están involucrados todos os niveis asistenciais e múltiples profesionais", asegurou Gómez Caamaño. Nos últimos catro anos, houbo en Galicia 12.000 posibles casos de trauma grave, por iso estiman que cada ano este protocolo se poida activar ao redor de 3.000 veces.