O Sergas nega colapso sanitario nos PAC e Urxencias o verán pasado
Anuncia que repetirá este ano o mesmo plan que o pasado.
Por Europa Press / Redacción | SANTIAGO DE COMPOSTELA | 19/06/2025 | Actualizada ás 16:58
O director xeral de Asistencia Sanitaria do Servizo Galego de Saúde, Alfredo Silva, informou de que en próximos días presentarase o plan do Sergas para o verán que prevé repetir medidas implementadas o ano pasado, ao seu xuízo, de forma efectiva.
En resposta a unha pregunta do BNG na Comisión de Sanidade, Silva Tojo asegurou "non houbo colapso en período estival" en 2024, unha cuestión que achaca a un plan que incluía cuestións que se prevén replicar como: o emprego de médicos MIR en último ano de formación, mobilidade temporal a centros que necesiten reforzos e sumar a médicos doutras comunidades e do 061 para os puntos de atención continuada (PAC), entre outros.
Nesta liña, remarca que no verán de 2024 rexistrouse un aumento en 25.000 (+6%) en urxencias atendidas no PAC e unha alza de 500 operacións cirúrxicas prioritarias (+8,6%) en comparación co ano anterior, entre outros. Alfredo Silva apunta que estarán operativas o 88% das camas, cando a ocupación "real" entre xuño e setembro nos últimos anos foi do 72%.
En cambio, Montse Prado (BNG) denunciou que a asistencia sanitaria é "realmente deficitaria" durante o ano, pero "chega a situación límite" en período estival. Critica que a 19 de xuño siga sen coñecerse o plan para o verán mentres se viven "colapsos" como os de urxencias do Complexo Hospitalario Universitario de Santiago (CHUS), pois "non hai día que os corredores dos servizos de urxencias non sexan un drama".
DEPENDENCIA
Noutra orde de cousas, nesta comisión Silvia Longueira (PSdeG) denunciou o atraso na atención a dependentes en Galicia. En resposta, a secretaria xeral técnica de Política Social, María Francisca Gómez Santos, defendeu un aumento de prazas e redución de tempos de tramitación. Gómez Santos denuncia que a achega a dependencia o ano pasado por parte do Estado non alcanzou o 35%, cando debe ser do 50%, e alerta de que en 2025 ese apoio "vai ser máis baixo" e "vai ir a peor".
