O PPdeG insta ao Goberno a rescatar "de inmediato" a AP-9 e alega: "A xestión por parte do Estado foi claramente prexudicial"
Segundo os cálculos da Xunta, o custo da indemnización polo rescate da vía "sería semellante" ao custo que supón o mantemento do actual sistema de bonificacións para os usuarios ata o final da concesión.
Por Europa Press / Redacción | SANTIAGO DE COMPOSTELA | 10/08/2025 | Actualizada ás 19:21
O Partido Popular de Galicia instou ao Goberno central a acordar "de inmediato" o rescate da concesión e a liberación das peaxes da AP-9 por ser, tal e como indicou, "a opción máis beneficiosa para Galicia e máis razoable para as contas públicas". Todo isto tras o recente ditame da Comisión Europea, que considera ilegal a prórroga da concesión da vía. Neste contexto, o PPdeG indicou que o rescate desta autoestrada estatal e a liberación das peaxes supón "a alternativa máis vantaxosa para o interese público".
A continuación, engadiu que, segundo os cálculos da Xunta, o custo da indemnización polo rescate da vía "sería semellante" ao custo que supón o mantemento do actual sistema de bonificacións para os usuarios ata o final da concesión. Por todo iso, os populares presentaron unha proposición non de lei no Parlamento para aproveitar a "xanela de oportunidade" que supón, na súa opinión, o prazo de resposta concedido ao Executivo por parte das autoridades europeas.
"Queda acreditado unha vez máis que a xestión da Autoestrada do Atlántico por parte do Estado nos últimos anos foi claramente prexudicial para o interese xeral e especialmente para Galicia", sinalou o portavoz de Infraestruturas do Grupo Popular no Parlamento galego, Roberto Rodríguez. Por todo isto, Rodríguez e o resto de deputados do PPdeG consideran "unha oportunidade única" este momento e instan así o Goberno de España a "reflexionar sobre a conveniencia dun rescate que, canto máis tarde se faga, máis caro será para o peto dos galegos e do resto de españois".
