Diego Calvo: "Cando hai un feito de violencia de xénero, animamos a denunciar"

O conselleiro de Presidencia, Diego Calvo, congratulouse do incremento do número de denuncias por violencia de xénero no primeiro trimestre do ano en Galicia, aínda que precisou que á Xunta o que lle gustaría é que "desaparecese" esta secuela.

"O que nos gustaría é que non se producisen nunca porque desaparecesen --os casos de violencia de xénero--. Pero, mentres existan, nós o que queremos é que se sigan denunciando, que siga así a tramitación e que se resolvan", destacou, a preguntas dos xornalistas na rolda de prensa posterior ao Consello.

"Cando hai un feito de violencia de xénero, animamos a denunciar. Por suposto. Gustaríanos que desaparecesen, pero, mentres existan, queremos que se siga denunciando e estamos a pór moitos recursos para que isto sexa así", engadiu.  Respecto diso, sinalou que "a disposición da vítima" habilítanse recursos nos xulgados, nas oficinas de atención e "mesmo agora de maneira telemática, para que non teñan nin sequera que esperar".

De feito, o Goberno galego, co seu presidente á cabeza, estivo rodeado de polémica nas últimas semanas logo da dimisión do ex conselleiro de Pesca, Alfonso Villares, tras ter pendente unha causa xudicial por unha denuncia de agresión sexual. Unha situación que provocou que todos os conselleiros e o propio Rueda saíran na súa defensa.