Galicia acepta os compromisos do novo Plan Estatal de Vivenda e abre a porta a unha Conferencia Sectorial

Galicia vén de sumarse ao acordo do Goberno central para o futuro Plan Estatal de Vivenda 2026-2029, despois dunha reunión mantida co Ministerio de Vivenda e Axenda Urbana encabezado por Isabel Rodríguez. Deste xeito, a comunidade incorpórase ao grupo de territorios que xa aceptaron os tres compromisos mínimos esixidos polo Executivo español para avanzar cara á convocatoria dunha Conferencia Sectorial de Vivenda.

As outras comunidades que xa subscribiran o pacto son Euskadi, Cataluña, Navarra, Asturias e Canarias. Con Galicia, son seis os gobernos autonómicos que apoian formalmente esta proposta estatal. Segundo fontes ministeriais, se a totalidade das comunidades acepta estes requisitos, o Ministerio procederá a convocar de inmediato a devandita Conferencia Sectorial. En caso contrario, continuarían as negociacións por vía bilateral.

OS COMPROMISOS MÍNIMOS

O acordo proposto polo presidente do Goberno, Pedro Sánchez, durante a Conferencia de Presidentes do 6 de xuño, establece tres eixos fundamentais para poder acceder aos fondos do novo plan: triplicar o investimento en políticas de vivenda, cunha maior implicación autonómica: as comunidades deben achegar o 40% dos recursos; blindar a permanencia das vivendas construídas ou rehabilitadas con estes fondos, de maneira que pasen a formar parte do parque público de vivenda con carácter permanente, e garantir a transparencia mediante a achega de datos oficiais, co obxectivo de avaliar o impacto real das políticas aplicadas.

Estas condicións, segundo o Ministerio, constitúen "un acordo de mínimos e de sentido común" para garantir "o dereito a unha vivenda digna para sempre".

CRÍTICAS DAS COMUNIDADES DO PP

A decisión do Goberno central de condicionar a convocatoria da Conferencia Sectorial á aceptación previa destes compromisos foi cuestionada polas comunidades autónomas gobernadas polo Partido Popular. Estas rexións remitiron unha carta a Isabel Rodríguez na que reclaman a celebración "urxente" da Conferencia, alegando falta de información e participación activa na redacción do novo plan.

Segundo denuncian, non tiveron acceso ao borrador nin resposta ás achegas realizadas, polo que consideran que o procedemento non garante a corresponsabilidade real nin o diálogo institucional necesario.

O Ministerio respondeu lembrando que o Estado ten competencias para orientar o destino dos fondos estatais, segundo sentenza do Tribunal Constitucional, mais tamén recoñece que aquelas comunidades que non acepten os compromisos poderán desenvolver as súas propias políticas de vivenda sen acceder aos recursos previstos no plan estatal.