Galicia afronta o primeiro gran incendio do verán na Mezquita
Xa arderon 30 hectáreas.
Por Europa Press / Redacción | OURENSE | 02/07/2025 | Actualizada ás 10:08
Un incendio forestal no municipio ourensán da Mezquita, na parroquia de Chaguazoso, queima 30 hectáreas, segundo as últimas estimacións da Consellería do Medio Rural.
O lume, iniciado ás 19,46 horas do pasado martes, foi dado por estabilizado --aínda sen controlar-- por Medio Rural ás 8,50 horas deste mércores. Para as tarefas de extinción foron mobilizados polo momento: sete avións, cinco helicópteros, sete motobombas, 11 brigadas, cinco axentes e tres técnicos.
Por outra banda, fontes de Medio Rural explican a Europa Press que está activo un incendio forestal no municipio coruñés de Lousame, declarado ás 5,30 horas da madrugada deste mércores. As primeiras estimacións apuntan a unha hectárea arrasada.
Entre outros incendios iniciados o pasado martes e xa extinguidos están: Chandrexa de Queixa, parroquia de Casteligo, con 2,2 hectáreas queimadas (extinguido ás 23,45 horas); Pereiro de Aguiar, parroquia de Sabadelle, con 0,76 hectáreas queimadas (extinguido ás 20,20 horas); e Trives, parroquia de Cova, un conato de 0,01 hectáreas (extinguido ás 20,00 horas).
