O galego na plataforma xudicial implementarase “moi pronto”, segundo a Xunta

A Xunta de Galicia espera asinar "moi pronto" co Ministerio de Xustiza un primeiro convenio de cara a implementar o galego dentro do novo programa dixital de xestión procesual, de nome Atenea. O director xeral de Xustiza, José Tronchoni, adiantou durante a Comisión de Administración Xeral, Xustiza e Interior que o Goberno galego xa revisou o primeiro texto do acordo e así o remitiu ao Executivo central, do que agora "depende a firma". "Nós xa estamos en disposición de facelo, pero estamos a apremar ao Ministerio para que tamén o faga", urxiu.

Este documento xa establece unha cláusula que obriga ao desenvolvemento por parte da comunidade autónoma dos sistemas de soporte aos esquemas de tramitación e documentación xurídica en galego e castelán. O asunto levouno á comisión a portavoz de Xustiza do Grupo Socialista do Parlamento, Paloma Castro, que esixiu a Tronchoni un compromiso para o novo sistema de xestión xudicial teña o galego como opción prioritaria "desde o día 1".

"É un feito probado que o galego na xustiza é absolutamente residual", criticou Castro, que lembrou que co sistema actual, Minerva, o Goberno galego prometeu que a opción bilingüe íase a "implantar de forma progresiva". Tronchoni defendeu a este respecto que esta cuestión dependía do Ministerio, de forma que o traballo en traducións de modelos de resolucións procesuales fíxose, pero foi "inútil".

O director xeral de Xustiza, José Tronchoni, durante a Comisión, a 2 de xullo. XUNTA DE GALICIA | Fonte: Europa Press