O PSdeG propón un plan para "frear a desertización" do rural
O PPdeG tumba a iniciativa, apelando ás “políticas activas, ao “rigor institucional” e á “estabilidade”.
Por Europa Press / Redacción | SANTIAGO DE COMPOSTELA | 08/07/2025 | Actualizada ás 19:55
A deputada do PSdeG Silvia Longueira propuxo unha estratexia para elaborar un plan que "free a desertización" do rural galego nunha situación de "emerxencia demográfica" que, na súa opinión, non solucionan as políticas impulsadas pola Xunta. En concreto, a moción defendida pola parlamentaria socialista este martes no pleno do Parlamento de Galicia, e que foi rexeitada co voto do Grupo Popular, instaba á Xunta a presentar nos próximos tres meses un informe de avaliación das medidas levadas a cabo polas distintas consellerías co obxectivo de "frear a desertización no rural". Tamén demandaba realizar a través da Consellería de Política Social un plan estratéxico cun cronograma das medidas.
Na súa defensa, Longueira recoñeceu que a poboación de Galicia crece "moi timidamente", aínda que o resultado final é que "o territorio se desertiza" ao "aglutinarse nas cidades ou nas cabeceiras de comarca". Neste punto, criticou a "ausencia de resultados" das políticas de impulso demográfico do Executivo autonómico, polo que pediu analizar os programas que se fan ao "non dar o resultado esperado" e presentarse unha situación "insustentable para Galicia".
PPDEG REIVINDICA A LEI DE IMPULSO DEMOGRÁFICO
Pola súa banda, a deputada do PPdeG Noelia Pérez reprochou á oposición que "negue" que detrás da mellora dos datos demográficos estean "os efectos das políticas da Xunta". "Vostede pretende convencer aos galegos de que a xente que queda ou que vén a Galicia faino por inspiración divina", botou en cara a popular á deputada do Grupo Socialista.
Neste contexto, reivindicou as políticas "activas" e o "rigor institucional e a estabilidade" que, ao seu xuízo, "ofrece servizos e futuro". Así, reivindicou a lei de impulso demográfico e instou á oposición a consultar o DOG. "Aí é onde fala o Goberno", aseverou antes de apuntar que "aí están publicadas todas as accións reais". Tamén interveu neste debate a deputada do BNG Olalla Rodil que, tras enumerar diferentes medidas anunciadas polo Goberno galego que, segundo expuxo, non se efectuaron finalmente, acusou ao Goberno galego de "mentira e propaganda".
