Acepta dous anos por subornar a un axente ambiental para plantar eucaliptos
Fiscalía admitiu a suspensión da pena se non volve cometer un delito no prazo de dous anos.
Por Europa Press / Redacción | SANTIAGO DE COMPOSTELA | 22/07/2025 | Actualizada ás 11:47
Un home acusado dun delito de suborno por tentar subornar a un axente ambiental con 500 euros para facer plantacións ilegais en Touro, en outubro de 2023, aceptou unha pena de dous anos de cárcere. No entanto, Fiscalía admitiu a suspensión da condena de prisión coa condición de que o procesado, nacido en 1963, non cometa ningún delito no prazo de dous anos.
Fíxoo tras recoñecer os feitos o procesado e acordarse unha pena de dous anos de privación de liberdade, o pago dunha multa de 1.620 euros e o comiso dos 500 do intento de suborno. A avogada da defensa solicitou, ademais, a suspensión da execución da sanción de cárcere e o representante do Ministerio Público aceptou. Por iso, a xuíza acordou a súa cancelación coa condición de que o xa condenado non cometa ningún delito nun prazo de dous anos. A sentenza é firme.
FEITOS
Segundo o escrito de conformidade -- asinado por fiscal, avogada defensora do procesado e letrado da Xunta como acusación particular --, o acusado concertou unha cita co axente ambiental nunha glorieta da autovía A-54, confluencia coa estrada N-547, onde lle explicou que quería facer plantacións para aproveitamento madeireiro nunhas parcelas no municipio coruñés de Touro.
O traballador dependente da Consellería do Medio Rural contestoulle que non era posible facer esas plantacións, salvo nunha parcela. "Ao recibir unha resposta negativa", explica o documento, o procesado sacou 500 euros -- distribuídos en 10 billetes de 50 euros -- e afirmou que "había que chegar a un acordo" para poder plantar nesas leiras.
Acto seguido, o procesado "tirou os billetes dentro do asento do copiloto no coche oficial rotulado no que se desprazou ata o lugar o axente ambiental coa intención de torcer o debido exercicio do cargo do axente". O axente solicitou ao home que collese o diñeiro, "pero lonxe de facelo así, o acusado abandona o lugar no seu propio vehículo deixando no interior do automóbil do funcionario público os 500 euros cos que pretendía alterar o recto exercicio do cargo do funcionario público".
O efectivo denunciou os feitos o 27 de outubro de 2023. Posteriormente, o acusado recoñeceu dita actuación en sede xudicial e colaborou coa investigación.
