A Xunta xustifica que non pode acoller menores migrantes pola "sobre explotación" dos centros
Acusa ao Goberno de tratar os menores migrantes como "paquetes".
Por Europa Press / Redacción | VIGO | 22/07/2025 | Actualizada ás 14:10
A conselleira de Política Social e Igualdade, Fabiola García, pediu ao Goberno central que non siga tratando aos menores emigrantes non acompañados como "paquetes" e que "dialogue" coas comunidades autónomas para acordar a súa acollida.
En declaracións aos medios de comunicación, García lamentou o novo decreto que aprobará o Consello de Ministros para a repartición destes menores entre as comunidades, solicitando ao Executivo que "respecte" e que "dialogue" coas distintas rexións para "chegar a acordos".
"Pedimos que volva ao diálogo e que deixe dunha vez por todas a vía das imposicións. Non se pode continuar tratando aos menores como paquetes, eximirse das súas responsabilidades e tentar traspasar ás comunidades autónomas unha responsabilidade que é nestes momentos do Goberno", subliñou Fabiola García.
A conselleira reivindicou que Galicia é "solidaria" do mesmo xeito que o resto de España, pero na actualidade existe unha "sobreocupación" dos centros de menores galegos, que están ao 108%. "Co cal nos preguntamos como imos acoller a 317 menores se non temos capacidade residencial. Queremos acoller? Si, pero dentro da nosa capacidade. Non se pode ser solidario co que non se ten", sentenciou.
