“Galicia non é unha bandeira de festivos, é unha causa diaria”, clama Besteiro en Rianxo

O PSdeG celebrou este 25 de xullo, Día Nacional de Galicia, na vila natal de Castelao, Rianxo, como fai desde hai 30 anos. Alí, o secretario xeral do partido, José Ramón Gómez Besteiro, apelou a un galeguismo “do século XXI” e advertiu que “Galicia non é unha bandeira que se saca en festivos, senón unha causa diaria”. Reivindicou máis autogoberno dentro dun Estado federal e un novo modelo de financiamento “singular, suficiente, corresponsable e solidario”.

Durante o acto, Besteiro cargou contra o presidente da Xunta, Alfonso Rueda, por negarse a acoller menores migrantes e por boicotear, segundo el, a oficialidade do galego na Unión Europea. "Deshumaniza Galicia como país", lamentou. O líder socialista tamén fixo referencia a conflitos internacionais como a guerra en Ucraína e o xenocidio en Gaza, criticando o silencio de algúns partidos, nunha alusión indirecta ao BNG.

No panorama galego, diferenciou tres formas de entender Galicia: unha do PP, “cada vez máis ultra e envexosa de Vox”; outra do BNG, que cualificou de “nacionalismo excluínte que fala no nome de todos sen preguntar”; e unha terceira, a do PSdeG, que definiu como “un galeguismo que une, que traballa e que resolve”. Neste sentido, reprochou ao Bloque que non apoiase medidas sociais recentes no Congreso.

Besteiro puxo en valor os logros do socialismo para Galicia, como a chegada da Axencia Estatal de Intelixencia Artificial á Coruña ou a presenza da Axencia Europea da Pesca en Vigo. Tamén mencionou o papel de Galicia como potencia en sectores como a automoción, o téxtil ou o agroalimentario. “Temos talento, temos potencial, pero Galicia está gobernada por quen nin a entende nin a quere entender”, dixo.

Finalmente, fixo fincapé na crise da vivenda e acusou á Xunta de “desregular e liberalizar” mentres os concellos socialistas e o Goberno estatal aplican medidas como o Banco Público de Alugueiro, a vivenda protexida ou a loita contra a infravivenda. “Iso é galeguismo útil”, concluíu.