O plan de ordenamento do polígono de Carballiño-Maside á espera da luz verde ambiental

A Consellería de Economía e Industria remitiu á Consellería de Medio Ambiente e Cambio Climático para a súa tramitación ambiental o borrador do Plan Estruturante de Ordenación do Só Empresarial (PEOSE) do parque empresarial de Carballiño-Maside, que afecta a estes dous municipios da comarca do Carballiño (Ourense) e que prevé crear 886.478 metros cadrados de chan para uso industrial. Tal e como detallou a Xunta, este proxecto conta con dúas zonas de actuación diferenciadas, xa que está localizado en dous municipios en ámbitos lindeiros entre eles. A primeira supón unha ampliación do actual parque empresarial do Carballiño ata o suroeste, mentres a segunda desenvólvese integramente no concello de Maside, ao sueste da estrada OU-504.

O acceso viario ao novo parque empresarial farase a través dunha ligazón a distinto nivel desde a estrada OU-504, no caso do sector de Maside, mentres que no caso do Carballiño empregaranse as conexións do parque xa existente. A localización do novo polígono é estratéxica para toda a comarca, xa que está próxima ao acceso da autovía AG-53, que une a Autovía das Rías Baixas con Santiago de Compostela e a AP-9. O borrador do Plan Estruturante de Ordenación de Chan Empresarial (Peose) que agora se remite á aprobación ambiental prevé crear 886.478 metros cadrados de chan industrial, dos que 517.710 son de superficie útil. Deste xeito, destacou a Xunta, multiplicarase por 2,6 a superficie do parque actual, que conta con 341.395 metros cadrados, e que está practicamente esgotado, xa que tan só hai unha parcela dispoñible.

O presidente da Xunta, Alfonso Rueda, nun acto no polígono industrial do Carballiño (Ourense). XUNTA