“Non hai que ir ao notario”: Rueda rexeita máis formalismos e insta a convocar o Consello de Política Fiscal

O presidente da Xunta, Alfonso Rueda, considera que a “fronte común” entre comunidades autónomas contra a proposta do novo modelo de financiamento xa está consolidada, sen necesidade de formalización adicional. Defende que hai consenso entre autonomías de distintos signos políticos, e lembra a ‘Declaración de Santiago’ de 2021 como base suficiente. Rueda critica que o Goberno central non convoque o Consello de Política Fiscal e Financeira e advirte de que a eventual cota catalá suporía un agravio para o resto das comunidades.

Rueda amósase aberto a reactivar o acordo interterritorial se é necesario, pero alerta contra formalizacións que poidan xerar divisións. Asegura que as comunidades chegarían a un acordo se se lles chamase a dialogar e censura que Pedro Sánchez considere inviable unha reforma pola súa complexidade. Insiste en que a vontade de consenso existe, pero falta vontade política do Goberno estatal.

Respecto á condonación da débeda, o titular da Xunta insiste en que non ten sentido como medida illada, pero estaría disposto a aceptala se se acompaña doutras reformas estruturais. Reitera que Galicia non obtén un beneficio real coa condonación nos termos actuais e reclama que a prioridade sexa a reforma global do financiamento autonómico, que permita atender mellor servizos esenciais.

En clave estatal, Rueda ve “urxentísima” unha convocatoria de eleccións xerais, por considerar que a situación actual do Goberno de Pedro Sánchez é insostible. Avisa da falta de interlocución nos ministerios, critica a corrupción e descarta un achegamento a Carles Puigdemont. Tamén propón cambiar a lei para que un fiscal xeral procesado teña que dimitir automaticamente.

Sobre inmigración e outras cuestións sociais, defende unha “inmigración ordenada” e pide competencias para xestionar permisos de traballo. Asegura que non hai un aumento xeneralizado da delincuencia vinculada a persoas migrantes, pero admite preocupación por casos illados. Apoia dar unha oportunidade ao presidente valenciano Carlos Mazón tras a DANA e defende a foto de Feijóo con Aznar e Rajoy como mostra de continuidade e orgullo polo pasado do PP.