A alerta laranxa por calor reducida a 74 municipios galegos que manteñen a suspensión de actividade deportiva
Meteogalicia estende a alerta amarela igualmente á zona do interior de Pontevedra, que alcanzará máximas por encima dos 34º C
Por Europa Press / Redacción | SANTIAGO DE COMPOSTELA | 06/08/2025 | Actualizada ás 16:04
A Xunta, en base ao seu plan de actuacións fronte aos efectos sobre a saúde das altas temperaturas, situou en nivel laranxa a un total de 74 municipios galegos, correspondentes a zonas isoclimáticas de Ourense (Miño, montaña, noroeste e Valdeorras) e Pontevedra (interior).
En consecuencia, neles permanece suspendida a actividade deportiva federada durante todo o día. Trátase de 16 municipios menos que na xornada do martes, onde esta norma se aplicou sobre un total de 90. Ademais, as localidades do interior da Coruña atópanse en nivel amarelo.
Meteogalicia informa de que persiste o aire cálido sobre Galicia, que deixa valores de novo altos en todo o interior. Pola contra, as temperaturas suavízanse no litoral debido á entrada de néboa.
Neste sentido, a Xunta determinou a suspensión da actividade deportiva federada no cinco zonas onde se sitúa esta alerta laranxa. Quedan exentas as actividades acuáticas, que no entanto se recomenda non realizar nas horas centrais do día, é dicir, entre as 12.00 e 17.00 horas.
No noroeste de Ourense, esta medida afecta a Amoeiro, Avión, Beariz, Boborás, O Carballiño, Coles, O Irixo, Maside, A Peroxa, Piñor e San Cristovo de Cea Vilamarín.
No Miño de Ourense, os municipios afectados son A Arnoia, Barbadás, Beade, Carballeda de Avia, Cartelle, Castrelo de Miño, Cenlle, Cortegada, Leiro, Melón, Nogueira de Ramuín, Ourense, Padrenda, O Pereiro de Aguiar, Pontedeva, Punxín, Ribadavia, San Amaro, San Cibrao das Viñas, Taboadela e Toén.
Á zona da montaña de Ourense pertencen os concellos do Bolo, Carballeda de Valdeorras, Castro Caldelas, Chandrexa de Queixa, Esgos, A Gudiña, Maceda, Manzaneda, A Mezquita, Montederramo, Parada de Sil, A Pobra de Trives, Riós, San Xoán de Río, A Teixeira, A Veiga, Viana do Bolo, Vilariño de Conso e Xunqueira de Espadanedo.
En Valdeorras, o risco afecta ao Barco de Valdeorras, Larouco, Petín, A Rúa, Rubiá e Vilamartín de Valdeorras.
O interior de Pontevedra comprende os municipios de Agolada, Campo Lameiro, A Cañiza, Cerdedo-Cotobade, Covelo, Cuntis, Dozón, A Estrada, Forcarei, Fornelos de Montes, Lalín, A Lama, Moraña, Rodeiro, Silleda e Vila de Cruces.
RECOMENDACIÓNS SANITARIAS
A Consellería de Sanidade lembra os principais consellos e recomendacións que debe seguir a poboación nestes casos. En canto á inxesta de líquidos e alimentos, aconsella beber máis líquidos sen esperar a ter sede, sobre todo auga e zumes de froita lixeiramente fríos; evitar bebidas quentes, alcohólicas, café, té ou cola e as moi azucaradas; aumentar o consumo de ensaladas, verduras e froitas, e evitar comidas copiosas.
Así mesmo, insta a usar roupa de tecidos naturais, lixeira e folgada, de cores claras, chapeu, lentes de sol e cremas protectoras solares, así como calzado fresco, cómodo e que transpire; permanecer en espazos ventilados ou acondicionados e estar á sombra.
Ademais, recomenda utilizar as habitacións máis frescas da vivenda; durante o día baixar as persianas e abrir as xanelas, abrilas pola noite para ventilar, e, cando se estacione o coche, non deixar no interior nenos, nin anciáns coas xanelas pechadas.
No caso de sufrir esgotamento ou un golpe de calor, recoméndase solicitar axuda médica urxente chamando ao 061.
ALERTAS METEREOLÓXICAS
Doutra banda, en canto ás alertas metereolóxicas --diferenciadas do plan de efectos sobre a saúde--, a zona do Miño de Ourense permanece en aviso laranxa por altas temperaturas desde o mediodía deste mércores ata a noite. Alí, existe un risco importante por temperaturas de 39º C entre as 13.00 horas e 20.59 horas, segundo informa a Axencia Estatal de Metereoloxía (AEMET).
Por outra banda, un total de seis zonas en Galicia, sitúanse en alerta amarela durante este tempo: en Ourense, Valdeorras, o noroeste e o sur; en Pontevedra, a zona do Miño, e en Lugo, o sur.
En todas elas espérase, polo xeral, máximas de 36º C. Con todo, o sur de Ourense poderá alcanzar puntualmente os 39º C na contorna de Verín e no Miño de Pontevedra poderanse superar os 36º C localmente. Ademais, o sur de Lugo poderá alcanzar máximas por encima dos 38 ºC e alcanzar os 39 puntualmente.
Ademais, Meteogalicia estende a alerta amarela igualmente á zona do interior de Pontevedra, que alcanzará máximas por encima dos 34º C.
