A CIG culpa á Xunta dos accidentes de brigadistas polo seu "irresponsable" operativo
Denuncia que o Goberno galego aposte por un modelo con brigadas municipais "non profesionais" como a de Oímbra na que houbo tres feridos.
Por Europa Press / Redacción | Santiago de Compostela | 13/08/2025 | Actualizada ás 17:56
A CIG esixe responsabilidades á Xunta de Galicia pola súa xestión “irresponsable do operativo de loita contra incendios”, que considera “improvisada e moi atomizada”, provocando, segundo o sindicato, un “desastre” con accidentes de brigadistas durante a vaga de lumes.
O sindicato censura “a obsesión” do Goberno galego co modelo de contratación de brigadas municipais, destacando o caso de tres brigadistas feridos por queimaduras en Oímbra. Sinala que se trata de brigadas non profesionais, dependentes dos municipios, que comezaron a traballar hai poucas semanas.
A CIG critica tamén a política de contratación na Consellería do Medio Rural, lembrando que se realizaron 14 chamamentos de máis de 550 prazas, a maioría no mes de xullo. As probas físicas e visuais realizáronse entre o 21 e o 23 de xullo, polo que moitos brigadistas apenas contan con días de experiencia e non recibiron formación suficiente.
Zeltia Burgos, responsable de CIG-Administración Autonómica, alerta de que persisten diferenzas de trato entre o persoal, sobrecargándose con xornadas de 8 a 12 horas diarias. Advirte de que a falta de descansos aumenta o cansazo e, en consecuencia, o risco de accidentes. A Administración galega tamén se nega a cubrir vacacións e baixas, deixando brigadas reducidas e menos protexidas.
A situación agrávase polo feito de que o persoal non recibe avituallamento nin auga nos incendios, nin tampouco existe reposición suficiente de equipos de protección individual. A CIG leva meses alertando de que non hai stock suficiente para garantir a seguridade e evitar queimaduras, e anuncia que denunciará cada incumprimento e pedirá investigacións sobre cada accidente laboral.
Doutra banda, Comisións Obreiras solicitará unha reunión coa conselleira do Medio Rural, María José Gómez, para analizar as carencias do dispositivo, mentres o Sindicato Labrego Galego denuncia que Galicia arde pola “inacción e abandono planificado do rural” e Amigas da Terra pide a creación dunha mesa de traballo sobre incendios no Consello Forestal de Galicia.
