Última hora: O incendio da Fonsagrada achégase á localidade de Aguiar

A situación na provincia de Lugo nesta vaga de incendios que arrasa Galicia recrudécese de novo tras a melloría rexistrada en Ourense, onde se desactivou esta tarde a Situación 2. Ao incendio que arrasa os concellos de Quiroga e A Pobra do Brollón sumouse outro na Fonsagrada, concretamente en San Pedro de Río, outro lume forestal que se orixinou ás 1.59 da madrugada e que ás 9.00 xa alcanzara as 20 hectáreas.

Descoñécense todavías as razóns deste novo lume, que está preto da localidade de Aguiar, o núcleo habitado máis próximo que, segundo asegura o seu alcalde, Carlos López, conta coa vantaxe engadida de que está limpo de maleza ao seu arredor "polo que no caso de que se achegasen as chamas serían máis fáciles de conter".

Nos labores de extinción están a traballar catro axentes, 10 brigadas, 10 motobombas, unha pa, dous helicópteros e dous avións, ademais dun gran número de veciños e medios municipais. "O que non está a axudar é o tempo, xa que fai moita calor e levantouse esta tarde o vento, o que pode dificultar moito máis os labores de extinción", engadiu.

OS SINDICATOS PIDEN O CESAMENTO DE CARGOS DE MEDIO RURAL

Os sindicatos CCOO, CSIF e UXT esixen cesamentos e substitucións na Consellería de Medio Rural, concretamente a do Secretario Xeral Técnico, por unha xestión da vaga de incendios que cualifican de "nefasta" e "neglixente". Nun comunicado, as tres centrais sindicais apuntan que o principal problema é a existencia de ao redor de 200 postos de traballo sen cubrir no SPIF, "un servizo esencial para a seguridade cidadá e a protección do patrimonio natural de Galicia".

"Estas carencias foron negadas sistematicamente pola Secretaría Xeral, ata que, tras as denuncias públicas realizadas polo tres sindicatos a comezos de agosto, a Consellería viuse obrigada a recoñecer a situación e facer un chamamento extraordinario para cubrir 198 prazas estruturais, non operativas porque os seus titulares se atopaban en situación de incapacidade temporal", relatan.

Indican que a pesar de que "apenas se cubriu un 50% das prazas, non se fixo ningunha nova xestión para garantir a cobertura total dos efectivos". Así, "en plena vaga de incendios, o servizo segue cun déficit de persoal que pon en evidencia a inacción e a falta de responsabilidade por parte da Secretaría".

OS INCENDIOS NON DAN TREGUA

A vaga de incendios que azouta Galicia desde hai dúas semanas non dá tregua, subindo os focos activos a catro. Aínda que a Situación 2 de alerta xa se desactivou na provincia de Ourense, continúa activa na Proba do Brollón cun incendio que calcina xa 800 hectáreas. Ademais, en Lugo rexistrouse outro foco, na Fonsagrada. Recólleo a última actualización enviada pola Consellería do Medio Rural, que unicamente informa de incendios superiores a 20 hectáreas.

A Pobra do Brollón continúa en Situación 2 como medida preventiva pola proximidade aos núcleos de Golmar, neste municipio, e Conceado e San Pedro, en Quiroga, localidade lucense tamén afectada o incendio de Larouco, xa estabilizado. O lume afecta a unhas 800 hectáreas.
Na provincia de Lugo notifican tamén un foco na Fonsagrada, na parroquia de San Pedro de Río. Iniciado ao redor das 01.50 horas, segundo as últimas estimacións provisionais rolda as 20 hectáreas.

Polo seu lado, en Ourense, continúan activos os lumes de Avión (Ourense), que queima unha superficie estimada de 250 hectáreas na parroquia de Nieva; e o de Carballeda de Valdeorras, na parroquia de Casaio, que calcina 4.700 hectáreas en Galicia tras propagarse a Ourense o lume iniciado o xoves 14 de agosto na localidade zamorana de Porto. Este incendio afecta as montañas de Trevinca.

INCENDIOS EN QUIROGA E OUTEIRO

O novo incendio forestal arrasou unhas 600 hectáreas en Quiroga, no sur de Lugo, despois de iniciarse na parroquia de Abrence, no Concello da Pobra do Brollón. A vaga de incendios que xa afectou 9.000 hectáreas en Quiroga a pasada semana obrigou a declarar a Situación 2 de emerxencia pola proximidade das chamas a varios núcleos de poboación. Durante a noite, os veciños de sete núcleos permaneceron en alerta mentres efectivos de extinción mobilizaban brigadas, motobombas, helicópteros e avións sen que se producisen evacuacións forzosas.

Mentres se combatía este foco, en Outeiro reactivouse outro incendio do gran lume iniciado en Larouco, que quedara controlado a pasada semana tras arder unhas 30.000 hectáreas. Por agora, este foco está controlado e a atención céntrase de novo na Pobra do Brollón, en xornada de loito polo falecemento do seu tenente de alcalde, Ricardo Rodicio González. As principais vías afectadas foron a N-120 e a LU-993, así como a liña ferroviaria entre San Clodio Quiroga e Pobra do Brollón, xa reabertas posteriormente.

O Consorcio Provincial de Bombeiros da Coruña desprazou efectivos a Quiroga para reforzar o operativo, garantindo a continuidade das tarefas sobre o terreo ante o avance das chamas favorecido por vento e altas temperaturas. O presidente da Deputación, Valentín González Formoso, destacou o esforzo dos profesionais e a importancia dun sistema público de emerxencias coordinado e ben dotado para afrontar situacións tan complexas.

A subdelegada do Goberno en Lugo, Isabel Rodríguez, visitou o posto de mando avanzado de Quiroga e destacou o labor conxunto dos equipos, con reforzos de militares e da UME, así como a chegada de máis helicópteros. Insistiu na necesidade de unidade e responsabilidade ante a emerxencia e reafirmou o compromiso do Goberno de España con Galicia na loita contra os incendios.

O DETIDO EN ARBO, INVESTIGADO DENDE 2022

Axentes do SEPRONA da Garda Civil de Pontevedra, en colaboración coa Unidade de Investigación de Incendios Forestais (UIFO) da Consellería de Medio Rural, detiveron nas últimas horas a un veciño de Arbo, de 47 anos de idade e sen antecedentes, pola súa presunta vinculación con numerosos incendios forestais provocados de forma intencionada.

Os investigadores seguíanlle a pista desde 2022 pola súa suposta relación con varios incendios rexistrados na parroquia de Mourentán, en Arbo, e tamén no municipio veciño da Cañiza. Un dos lumes levou a decretar a situación 2 de emerxencia pola proximidade a núcleos habitados.

As pescudas realizadas pola Garda Civil e pola UIFO permitiron identificar ao suposto autor dos incendios, que foi detido e posto a disposición do Tribunal de Instancia 2 de Ponteareas. O home foi posto en liberdade, como investigado por un delito de incendio forestal. Con todo, a investigación continúa aberta e non se descartan novas dilixencias encamiñadas a esclarecer outros feitos similares ocorridos na zona.

REABERTA A ESTRADA LU-993

A estrada LU-993 foi reaberta á circulación na mañá deste martes, tras ser cortada o luns polo incendio iniciado na Pobra do Brollón. 112 Galicia informa de que os vehículos xa poden transitar entre os quilómetros 18,5 e 24,2 do viario, tramo que permanecía pechado á primeira hora.

O lume de Pobra do Brollón, que segue en alerta por proximidade do mesmo a vivendas, continúa avanzando sen control desde o seu inicio no mediodía do luns e xa calcina ao redor de 600 hectáreas, segundo a Consellería do Medio Rural.

PERIGO DE INCENDIOS

Os niveis de perigo de incendios continúan moi altos ou extremos en amplas zonas da metade norte peninsular, e tamén en áreas do leste, segundo ha informaado a Axencia Estatal de Meteoroloxía (Aemet) no seu perfil da súa rede social X. Debido a esta situación, a Aemet pediu "un día máis, extremar as precaucións" naquelas zonas con maior risco localizadas especialmente no interior de Galicia e todo Castela e León.

CSIC

O Consello Superior de Investigacións Científicas (CSIC) activou o Grupo de Asesoramento de Desastres e Emerxencias (GADE) para prestar asesoramento científico-técnico experto fronte as consecuencias da onda de incendios forestais que están a afectar a diversas comunidades autónomas durante as últimas semanas.

O GADE xa comezou a traballar na recuperación do Ben de Interese Cultural (BIC) das Medulas tras o incendio iniciado na localidade de Yeres (León) que afectou a esta paraxe. Ademais das Medulas, o GADE pon a disposición as capacidades do CSIC ao resto de zonas afectadas polo lume.