“Hai que valorar a capacidade e a entrega, non o xénero”

“Hai que valorar a capacidade e a entrega, non o xénero”. Así o resume Noelia García Ordóñez, unha das poucas mulleres bomberas que participaron nos operativos contra os grandes incendios que arrasaron Galicia este mes, sobre todo na provincia de Ourense. Para ela, o traballo de extinción “non entende de diferenzas” e resulta “reconfortante” comprobar que cada vez hai máis mulleres nos equipos. “Oxalá se vexa con máis normalidade e sirva de exemplo para que outras se animen”, engade.

García Ordóñez celebra que Galicia quedase libre de lumes activos tras 15 días de traballo intenso, cunha mestura de “cansazo e orgullo”. Durante as xornadas máis duras, lembra estar “ao pé do canón” en situacións de gran risco e tensión constante. “Temos que estar alerta en todo momento polo perigo ao que estamos sometidas”, explica.

A pesar das dificultades, asegura que resulta alentador comprobar como o esforzo axuda a protexer os montes, a flora e a fauna. “Tentamos ver sempre o lado positivo, cada incendio extinguido é un incendio menos”, apunta. Con todo, recoñece que cada intervención implica unha “mestura de preocupación e adrenalina” que obriga a actuar con rapidez, pero sempre priorizando a seguridade do equipo. “Non debemos tomar iniciativas individuais porque poderiamos pór en risco a todos”, subliña.

Os días de lume tamén deixaron momentos de “impotencia” pola “topografía dificultosa” e a multitude de focos simultáneos. “Houbo ocasións nas que mover motobombas era moi complicado pola falta de humidade e pola cantidade de incendios, e non se pode estar en todos ao mesmo tempo”, lamenta. Esa complexidade incrementaba tamén a angustia dos veciños, que temían perder vivendas e traballos de toda a vida.

Fronte a iso, a bombeira asegura que o agradecemento da xente afectada compensa o esforzo. “É reconfortante ver como colaboran connosco e como expresan o seu agradecemento, nese momento vese que paga a pena”, afirma. De cara ao futuro, chama á sociedade a ser consciente da importancia da prevención para que “non se volva repetir” unha vaga de incendios como a deste verán.