Feijóo quere tipificar no Código Penal que un migrante irregular cometa "fraude" na idade ou na nacionalidade

O presidente do Partido Popular, Alberto Núñez Feijóo, asegurou este venres que se Goberna modificará a Lei de Estranxeiría para expulsar aos maiores de idade que se declaren menores e tipificará no Código Penal que se cometa "fraude" na idade e na nacionalidade. Feijóo realizou este anuncio durante a súa intervención no 'Foro La Toja', no que participaron o presidente da Xunta, Alfonso Rueda, e o de Andalucía, Juan Manuel Moreno, entre outros dirixentes do ámbito político e económico nacional e internacional.

O dirixente popular lanzou esta proposta nun contexto no que transcendeu que, na repartición de migrantes desde Canarias á península habería algúns coa maioría de idade xa cumprida. O presidente dos populares explicou durante a súa intervención a intención de "reparar" España e subliñou que, entre os asuntos que ten previsto abordar, está o da política migratoria porque, na súa opinión, "fracasou" e hai que ter un modelo para "arranxala". Así, advertiu: "Se cremos que un dos problemas da política migratoria é a fraude nas idades de quen de maneira xeral entra en España, debemos de perseguir esa fraude para que os menores non convivan cos adultos".

DETERMINAR "RÁPIDO" A IDADE

Por iso, apostou por determinar "rápido" a idade desa persoa que entre "ilegalmente" en España, para evitar que conviva con menores durante meses e estes queden "desprotexidos". Para iso, precisou que o seu plan migración fixará un máximo de tempo para comprobar a idade e para evitar solucións de desprotección e modificará dúas leis.

Por unha banda, a de Estranxeiría para poder "expulsar a calquera estranxeiro que se declarou menor de idade sendo maior de idade" --aínda que a norma xa contempla de forma xenérica a expulsión de calquera estranxeiro maior de idade que se atope en España de maneira irregular -- e por outra banda, reformará o Código Penal co fin de incluír expresamente a "tipificación da fraude da idade ou da nacionalidade do inmigrante".

"ESTRATEXIA DELIBERADA" DO GOBERNO PARA "CREAR TENSIÓN SOCIAL"

Noutra orde de asuntos, o presidente do Partido Popular ofreceuse este venres para acometer a que ve como principal "tarefa política" a enfrontar en España "hoxe": a "reparación" e a "reconciliación", "tirando abaixo o muro" que "divide" os cidadáns, fronte ao que considera unha "estratexia deliberada" do Goberno que dirixe Pedro Sánchez de "crear tensión social". O expresidente da Xunta afirmou que España "está atrapada" entre os "intereses pequenos e ás veces persoais dunhas poucas minorías" e sinalou o que considera as principais "anomalías" do país.

"TIRAR ABAIXO O MURO"

Feijóo proclamou que España "non necesita máis tensión", senón que "necesita máis cordura" e "non necesita máis división" senón que os españois se recoñezan "como compatriotas" coas súas diferenzas, pero tamén co que teñen "en común nos últimos 500 anos". Ao seu xuízo, a "tarefa política de hoxe" é a da "reconciliación" e traballar polo que "necesita" España: "unidade, cambio e reparación". Neste sentido, tirou de pregunta retórica para apelar aos presentes, entre os que estaban dirixentes políticos e económicos do ámbito nacional e internacional: "E que significa reparar España?". "Que a verdade prevaleza sobre a mentira; os principios, sobre a falta de integridade; a limpeza, sobre a corrupción; a igualdade, sobre o privilexio; a sensatez, sobre o sinsentido; e o servizo público, sobre o interese persoal", transmitiu.

"SENTIDO DE PERTENZA" E PROPOSTAS

Pero, tras queixarse de que "se perdeu o común denominador que permite falar dunha comunidade", tamén reivindicou o "sentido de pertenza", o que "comparten" os cidadáns, o que lles "identifica" e lles une. Nun momento da súa intervención, de feito, citou a coñecida frase de Adolfo Suárez de "elevar á categoría política de normal" o que na rúa "é simplemente normal". Ao tempo, apelou a recuperar "o sentido" como "dirección" porque "un país non pode vivir instalado na improvisación". A modo de símil, indicou que, do mesmo xeito que unha familia ou unha organización doutra índole "necesita proxecto, horizonte e rumbo".

PROXECCIÓN EXTERIOR

Antes, Feijóo lamentou que "mentres o mundo se move, España parece atrapada, pensando en pequeno", e acusou ao Goberno que dirixe Pedro Sánchez de "invadir" as institucións do Estado para usalas "como escudos" ou "lanzas". Faino, afeou, como "estratexia deliberada" para "crear tensión social". Non en balde, nun discurso no que censurou que Sánchez non convoque eleccións cando non foi capaz de aprobar os Orzamentos Xerais do Estado, insistiu na súa convicción de que "cando non hai resultados" é preciso "exhibir frentismo" e, na actual conxuntura, para o Executivo central, é "máis sinxelo" crear "trincheiras" que "tender pontes".