A Deputación da Coruña condena o xenocidio israelí en Gaza e reclama un alto ao lume inmediato

O pleno da Deputación da Coruña aprobou, na sesión deste venres, unha moción presentada por socialistas e nacionalistas de condena ao "xenocidio israelí en Gaza" e con demanda dun alto ao lume inmediato. A iniciativa contou tamén co apoio de Alternativa dos Veciños e a abstención do PP. Nela, esíxese tamén que Hamás non teña ningún papel que desempeñar no goberno de Palestina. No texto aprobado, a corporación provincial expresa a súa solidariedade co pobo palestino. Ao mesmo defíneo como "vítima dunha ofensiva de Israel que vulnera de forma sistemática os dereitos máis fundamentais". Así mesmo, manifesta o seu apoio ás manifestacións e expresións cívicas en favor do pobo palestino.

A sesión plenaria aprobou tamén unha moción do PP para esixir responsabilidades sobre os fallos do sistema Cometa para vítimas de violencia de xénero e outra do Grupo Socialista relativa aos discursos de odio e violencia política. Tamén houbo unha declaración institucional en apoio ás medidas da Xunta contra os incendios. Noutra orde de cousas, deuse luz verde, por unanimidade, a un investimento adicional de 22 millóns de euros para o Plan Único, que alcanza os 138 millóns, "consolidándose como o maior plan de cooperación municipal de Galicia e un dos máis ambiciosos do Estado", subliña o organismo provincial.