Setembro foi pouco chuvioso pero máis frío en Galicia: un 30 % menos de auga e case un grao menos de temperatura

Galicia rexistrou un setembro frío cun 30 % menos de precipitacións do habitual, segundo o avance do último informe climatolóxico elaborado por Meteogalicia. A precipitación media acumulada en Galicia no mes de setembro foi de 58 litros por metro cadrado, o que se traduce nunha anomalía do 30 % inferior ao computado polas 16 estacións meteorolóxicas neste período.

As cantidades de precipitación máis elevadas rexistráronse nas serras litorais con valores de entre 130 e 190 litros/m2, mentres que os valores máis baixos (entre 5 e 20 l/m2) localizáronse na zona meridional da meseta de Lugo e no leste da provincia de Ourense. Setembro quedou na influencia de baixas presións que achegaban aire frío e inestabilidade, e unha segunda parte con situacións anticiclónicas máis frecuentes.

No que respecta ás temperaturas, a media en setembro foi de 17,2 graos, 9 décimas menos do valor habitual neste período, o que significa que se tratou dun mes frío. As desviacións medias das temperaturas mínima (-1 grao) e máxima (-0,8 graos) foron tamén inferiores aos valores normais neste mes.

A media da temperatura mínima en Galicia en setembro foi de 10,5 graos. Os valores máis baixos (5,6 graos e 7,2 graos) rexistráronse nas serras do Larouco, Queixa e Eixe, mentres que os máis altos (entre 13,4 graos e 14,8 graos) localizáronse na costa oeste, sobre todo, na área da ría de Vigo. En canto ás temperaturas máximas, a media foi de 21,9 graos. Na ribeira do Miño ourensá, nos Canóns do Sil e no val do Támega rexistráronse os valores máis altos (entre 25,7 e 27 graos) e os máis baixos (16,4 graos e 18,2 graos) déronse na cabeza de Manzaneda.

Dúas persoas conversan no espigón de Foz | Fonte: Carlos Castro - Arquivo