A Deputación da Coruña impulsa un programa para apoiar comercio local en concellos de menos de 20.000 habitantes
Cun orzamento de 6 millóns de euros, 'MercaNaVila' permitirá aos cidadáns maiores de idade acceder a descontos de ata 100 euros por persoa para realizar compras nos comercios locais adheridos á campaña.
Por Europa Press / Redacción | A CORUÑA | 06/10/2025 | Actualizada ás 18:53
A Deputación da Coruña presentou este luns o programa 'MercaNaVila', unha iniciativa para apoiar o comercio local en municipios de menos de 20.000 habitantes da provincia. O acto contou coa presenza do presidente da Deputación, Valentín González Formoso; as deputadas provinciais Rosa Ana García, responsable da área de Emprego, Industria e Medio Ambiente, e Avia Veira; o portavoz do goberno provincial, Bernardo Fernández; e o presidente da Federación Galega de Comercio, José María Seijas.
Cun orzamento de 6 millóns de euros, 'MercaNaVila' permitirá aos cidadáns maiores de idade acceder a descontos de ata 100 euros por persoa para realizar compras nos comercios locais adheridos á campaña. Os descontos serán directos, de entre 5 e 15 euros por compra, segundo o importe, e están deseñados para dinamizar o consumo, apoiar ao pequeno comercio local e impulsar a vida económica e social de municipios medianos e pequenos.
O prazo de inscrición para comercios comezou hoxe e estímase que ao redor de 2.500 se unirán ao programa, que permitirá mobilizar case 25 millóns de euros en vendas no comercio local. Trátase dun dos maiores programas de impulso ao consumo local activados en Galicia nos últimos anos, segundo apuntou o presidente da Deputación, Valentín González Formoso, quen destacou que "a Xunta presuposta este ano 7,5 millóns de euros para toda Galicia en programas como este, mentres que a Deputación orza 6 millóns para unha soa provincia e para municipios de menos de 20.000 habitantes".
