A Xunta adxudicou o 86 % dos fondos europeos recibidos e reprocha ao Goberno a súa xestión dos PERTEs

O Consello da Xunta analizou este luns o informe de execución do Mecanismo de Recuperación e Resiliencia correspondente ao terceiro trimestre de 2025 que sostén que Galicia xa adxudicou 1.402 millóns de euros dos 1.635 que recibiu, o que supón o 86 %. En rolda de prensa tras a reunión semanal do Executivo autonómico, o conselleiro de Presidencia, Xustiza e Deportes, Diego Calvo, lembrou que Galicia ten asignados 1.745 millóns de euros do Fondo de Mecanismo de Recuperación e Resiliencia (MRR), dos que ata agora recibiu 1.635.

"É dicir, a día de hoxe non temos o 100 % do diñeiro, a pesar de que o prazo para xustificar finaliza o 31 de agosto de 2026", reprochou. "A pesar disto", engadiu, a máxima da Xunta "é clara": "Xestionar coa maior celeridade para que cheguen canto antes aos seus destinatarios. O informe presentado, segundo destacou o Goberno galego nunha nota de prensa, repasa tamén o estado de execución dos Proxectos Estratéxicos para a Recuperación e Transformación Económica (PERTE), que son "deseñados, planificados e xestionados polo Goberno central".

Neste sentido, explicou que existen 12 PERTEs aprobados con financiamiento de fondos MRR, que contan cun orzamento total de máis de 41 millóns de euros, pero "só se adxudicaron ata o momento 19.636 millóns (48 %)", porcentaxe que, destacou a Xunta, "contrasta cos datos de execución alcanzados" pola Administración autonómica. Sobre o impacto da execución da Xunta a través dos fondos europeos na sociedade galega, sinalou que ata finais do segundo trimestre de 2025 máis de 47.500 persoas físicas, máis de 8.000 autónomos e máis de 6.000 entidades e sociedades benefícianse dos fondos. "Unha vez máis, Galicia cumpre; non se pode dicir o mesmo dos fondos xestionados polo Goberno central a través dos Perte", reprochou Calvo en rolda de prensa.