A Deputación da Coruña apoia a demanda de servizos ferroviarios nas comarcas de Ferrol, Eume e Ortegal

O presidente da Deputación da Coruña, Valentín González Formoso, mantivo este luns unha reunión de traballo co Foro Cidadán polo Ferrocarril, dentro da rolda de encontros que esta plataforma desenvolve co obxectivo de reivindicar a modernización e mellora dos servizos ferroviarios nas comarcas de Ferrol, Eume e Ortegal. No encontro, celebrado na sede provincial, o presidente da institución coruñesa trasladou o "compromiso" da Deputación cun transporte ferroviario "digno e competitivo para o norte da provincia".

"Hoxe temos o pracer de recibir a este foro ferrolán que busca impulsar a modernización das infraestruturas ferroviarias de Ferrol á Coruña e a Deputación non pode quedar á marxe", remarcou. Por outra banda, Formoso e o presidente da Asociación Baroña, Ovidio Manuel Queiruga, asinaron un convenio de colaboración que permitirá a creación do Centro de Transformación Colaborativo e Alimentario Baroña, unha infraestrutura destinada a fortalecer o sector agroforestal local e promover un modelo de desenvolvemento sustentable no rural.

O proxecto conta cun apoio económico de 160.000 euros do organismo provincial. Tamén nesta xornada González Formoso visitou o Concello de Paderne, onde foi recibido polo alcalde, Sergio Platas, e membros do goberno municipal. Na visita, participou tamén a deputada de Política Social, Mar García. Durante o acto, o presidente provincial fixo entrega dun vehículo destinado ao Servizo de Axuda no Fogar, que permitirá mellorar a atención ás persoas maiores e dependentes do municipio.