Comeza a campaña de visitas guiadas á Costa dos Castros

A partir deste xoves 28 comezan as visitas guiadas ao patrimonio arqueolóxico de Oia, promovidas pola Asociación Costa dos Castros, o Concello de Oia e empresas colaboradoras como Terras Gauda. As visitas durarán todo o verán, son gratuítas e teñen por obxecto dinamizar o turismo da zona.

As visitas teñen dous formatos. Por unha banda, unha serie de visitas con horarios fixos e por outro, as que só se farán baixo demanda de grupos. Dentro das visitas regulares ofertadas están visitas diúrnas á Cabeciña (diarias, excepto luns) cun percorrido polos 4.000 anos de historia deste complexo arqueolóxico, Visitas nocturnas á Cabeciña, visitas ao barrio do Arrabal (sábados e domingos), que é o barrio que rodea o Mosteiro de Oia e visitas a Terras Gauda (diarias).

Ademais, a Asociación Costa dos Castros ofrece visitas que se realizarán baixo demanda de pequenos grupos: ao xacemento de Chavella coas súas espectaculares vistas, ao castro de Cano dos Mouros para coñecer ás súas lendas e ao petróglifo de Auga dos Cebros, cunha representación dun barco mediterráneo do II milenio a. C.

Para máis información, horarios e reservas pódese chamar ou contactar por Whatsapp ao 666435832, escribir a costadoscastros@gmail.com ou consultar na web (www.costadoscastros.com) e Facebook (www.facebook.com/costadoscastros) da Asociación Costa dos Castros.